Сайёҳ Хитой жин кўчаларидаги бозорда ўзи учун iPhone 6s йиғди (+видео)

Сайёҳ Хитой жин кўчаларидаги бозорда ўзи учун iPhone 6s йиғди (+видео)

Америкалик инженер Скотти Аллен умрининг бир неча ойини Хитойнинг Шанҳай шаҳрида ўтказиб, бу ерда электроника воситаларининг ноқонуний равишда ишлаб чиқарилиш жараёни билан яқиндан танишди. Скотти Аллен томонидан тақдим қилинган видеода Хитойдаги маҳаллий электроника бозори, жумладан iPhone смартфонлари тайёрланадиган ва унинг бутловчи қисмлари сотиладиган жин кўчалардаги чинакам манзара акс этган.

Ғоя ташаббускори ўзининг кўп вақтини смартфонлар учун турли қисмлар сотиладиган мазкур кўча-бозорларида ўтказиб, анча пайтгача бу “саноат”нинг таъминотчиси киму, харидори кимлигини англай олмади.

Аллен бу ердаги смартфон қисмларидан фойдаланиб айфон аппаратини йиғиб кўришга қарор қилади. Натижада, муҳандис тўлақонли ишлайдиган 16 гигабайтли доимий хотирага эга iPhone 6s флагманини йиғишга муваффақ бўлди. Айфон учун Хуацянбэй мавзесидаги маҳаллий электроника бозоридан керакли деталларни харид қилди. Аппарат учун керакли қисмларни сотиб олиш учун америкаликка $300 доллар керак бўлди. Бу эса, заводдан чиққан iPhone 6s’нинг нархидан 2 баробар арзон.

Скотти Алленнинг нега iPhone 7 флагманини эмас, айнан iPhone 6s’ни йиғишга қарор қилганининг сабаблари бор. Биринчидан, Аллен айнан шу моделдаги айфондан фойдаланади. У қўлидаги ва йиғилган айфонларни солиштириб кўришга осон бўлиши учун ҳам айнан шу моделни йиғишга қарор қилган. Иккинчидан, Apple’нинг сўнгги флагмани учун қисмларни топиш мушкул.

Қуйидаги 24 дақиқалик видеода Скотти Алленнинг қандай қилиб  ўзи учун iPhone 6s тайёрлаганига гувоҳ бўлинг: