Samsung АҚШдаги Galaxy Note 7 смартфонларини фаолсизлантиради
Шу йилнинг август ойида глобал тақдимоти ўтказилган Samsung Galaxy Note 7 том маънода компания учун энг омадсиз моделлардан бирига айланди. Сотувга чиқарилганига бир ой бўлмасдан смартфон батареясидаги (тахминларга кўра) ноосзлик боис уларни ялпи қайтариб олиш кампанияси бошланди. Бироқ алмаштирилган қурилмалар ҳам ёнишда давом этгач, компания 11 октябрдан бошлаб ушбу моделни ишлаб чиқаришни расман тўхтатган эди.
Гарчи Samsung бир неча бор турли ҳудудларда носоз Galaxy Note 7 смартфонларини қайтариб олиш бўйича дастурларни ишга туширган бўлса-да, аммо дунё бўйлаб сотилган 2 миллиондан ортиқ Galaxy Note 7 моделларининг ҳали ҳаммаси қайтарилмаган. Шу боис компания янада қаттиқроқ чора-тадбирлар кўришга “мажбур бўлмоқда”. Жумладан, бундан бир ҳафта олдин хабар берганимиздек, Samsung Австралияда ушбу маркадаги смартфонларни дастур янгиланиши орқали тармоққа уланмайдиган қилиши ҳақида маълум қилган эди.
Кеча эса Жанубий Корея компанияси энг кўп Galaxy Note 7 смартфонлари сотилган АҚШ ҳудудида ушбу смартфонларни янги прошивка ёрдамида бутунлай фаолсизлантириш ҳақидаги хабарлар пайдо бўлди. Бу борада Sammobile нашрида ёзилган хабарга кўра, Samsung бу ишни 19 декабрдан бошлаб 30 кун давомида амалга оширишни режалаштирган. Компаниянинг айтишича, АҚШда сотилган Galaxy Note 7 смартфонларининг 93 фоизи қайтариб олинган.
