Samsung буклама смартфонини Galaxy S9 прошивкаси «сотиб қўйди»!

Жанубий кореялик техногигантнинг Galaxy S9 ҳамда Galaxy S9+ флагманлари учун Android 9.0 Pie операцион тизимига асосланган Samsung Experience 10 прошивкаси тайёрланмоқда. Уни ўрганиб чиққан дастурчилар прошивкада учраган қизиқарли маълумотни XDA Developers сайтида эълон қилишди.

ЎҚИНГ: Samsung Galaxy X: кореяликлар инқилобий буклама смартфоннинг тақдимот куни ва ҳатто нархини ҳам айтишди!

Прошивканинг чиқиш кодида Galaxy S10 флагманининг тўртта версиясидан ташқари, кодли номи Winner бўлган яна битта смартфон эслаб ўтилган. Аввалроқ чиққан хабарларда мазкур ном Samsung’нинг буклама смартфонига тегишли экани маълум бўлганди.

Galaxy X (ёки Galaxy F) модели тарзида тақдим этиладиган қайишқоқ дисплейли буклама смартфон ноябрда тақдим этилиши кутилмоқда. Шундай экан, уни Galaxy S10 флагманлари билан бирга синовдан ўтказишаётгани ажабланарли ҳол эмас.

Прошивка кодида якка кристалли Qualcomm Snapdragon 8150 процессори хусусида ҳам эслатма мавжуд. Кузатувчилар ишонч билан таъкидлашларича, Snapdragon 845 чипининг кейинги авлоди кутилганидек Snapdragon 855 эмас, балки айнан Snapdragon 8150 номи билан тақдим этилади. У бешинчи авлод уяли алоқа тармоқларида ишловчи Snapdragon X50 модемини ҳам ўз ичига олади.

ЎҚИНГ:  Samsung директори сўз берди: буклама смартфон шу йилиёқ чиқади!