Samsung дисплей ва камера билан жиҳозланган совутгичнинг иккинчи авлодини кўрсатди
Жанубий Кореянинг Samsung компанияси бундан бир йил муқаддам дисплей билан жиҳозланган интернет уланишига эга совутгичларнинг янги турини намойиш қилган эди. Орадан бир йил ўтиб, фирма ушбу совутгичнинг янгиланган авлодини CES 2017 кўргазмасида тақдим этишга шайланмоқда.
Family Hub 2.0 номланган мазкур янги совутгичга ўрнатилган дисплейли компьютер орқали озиқ-овқат маҳсулотларига буюртма бериш, рецептларни кўриш ва веб-ресурсларга кириш мумкин. Дисплейнинг диагонали 21,5 дюйм. Биринчи авлод совутгичига ўхшаб янги авлоддаги қурилмада ҳам ичкаридаги маҳсулотларни кўришга хизмат қиладиган камера ўрнатилган. Қизиғи шундаки, камера орқали совутгичдаги маҳсулотларни дистанцион тарзда смартфон орқали ҳам кўрса бўлади. Совутгични махсус мобил илова ёрдамида бошқариш мумкин.
Янги Family Hub 2.0 овозли бошқарувни ҳам қўллаб-қувватлайди.
