Samsung энг ихчам ва арзон Galaxy A смартфонини тайёрлаяпти!

Смартфонлар борган сари катталашиб кетаётганини сиз ҳам пайқагансиз-а? Масалан, куни кеча чиққан 100 доллардан арзон Redmi 8A смартфонининг ҳам экрани диагоналига 6,2 дюймни ташкил этади.

ЎҚИНГ: Ностандарт дизайнли Galaxy A70s: расмий суратлари, нархи ва бошқа жиҳатлари

Samsung компаниясининг янгиланган Galaxy A туркумидаги энг арзон Galaxy A10 модели (сотиб олиш) ҳам 6,2 дюймлик дисплей билан жиҳозланган. Мазкур ишлаб чиқарувчи энди шундан кичкина смартфон энди чиқмаса керак, деётган бўлсангиз – адашасиз. Инсайдерларга кўра, у энди диагоналига 5,7 дюймлик экранга эга смартфон тайёрламоқда.

Хабарларга қараганда, янги телефон ихчамлигидан ташқари, Galaxy A10 ҳамда Galaxy A10s (харид қилиш) моделларидан ҳам арзон бўлади! Шунингдек, унинг 16 гигабайтлик ички хотирага эга эканлиги ҳам маълум.

Ушбу қурилма ҳақида бошқа маълумот йўқ, аммо унинг IPS матрицали Infinity-V ёки Infinity-U экран, етарлича сиғимдор аккумулятор, 2 гигабайтлик тезкор хотира ҳамда Exynos 7870 даражасидаги процессор билан таъминланишини тахмин қилиш мумкин. Афсуски, унинг аниқ нархи ва тақдимот куни ҳам ҳозирча маълум эмас.

Тўғри, 5,7 дюймлик экранга смартфонни ихчам дейиш қийин, аммо бугунги кун ўлчамларига кўра у барибир кичкинадир. Шунингдек, арзонлиги боис у хитойлик смартфонсозларнинг кўплаб моделлари билан беллаша олади.

ЎҚИНГ: Энди энг арзон смартфонларга ҳам Android 10 ўрнатса бўлади!