Samsung Galaxy A52 4G Geekbench'да пайдо бўлди
Модель рақами SM-A526B бўлган Samsung Galaxy A52 5G смартфони ўтган ой Geekbench эталон тестида ўзининг Snapdragon 750G чипи, 6ГБ «оперативка»си ва Android 11 OT билан кўриниш берганди. Энди эса қурилманинг SM-A525F модель рақамига эга 4G талқини бенчмарк маълумотлар базасида пайдо бўлди.
Кўрсатилишича, Galaxy A52 4G смартфони Snapdragon 720G чипсетига эга бўлиб, Android 11 тизимида ишлайди, тезкор хотираси эса 8ГБ.
Қурилманинг 4G версияси ҳам якка ядроли, ҳам бир неча ядроли тестда 5G талқиндан кўра кўпроқ балл тўплаган. Бироқ эслатиб ўтиш жоизки, ҳар иккала қурилма ҳам ҳали оммавий ишлаб чиқарилишни бошлагани йўқ, шунинг учун, натижалар сотувга чиқажак ҳақиқий A52'ларникидан фарқланади.
Galaxy A52'нинг 4G ва 5G версиялари ўртасида процессор ва тезкор хотирадан бошқа яна фарқли жиҳатлар бор-йўқлиги ҳозирча номаълум. Samsung'нинг ўзидан Galaxy A52 ҳақида расмий маълумотга эга бўлмасак-да, ўтган ҳафта чиққан рендерлардан смартфон қандай кўринишда бўлишини билиб олдик.
Galaxy A52 5G 6.5 дюймлик, марказида селфи камера учун айланасимон кемтикка эга дисплей ва экраности бармоқ изи сканери билан жиҳозланади. Орқа панелда эса тўртбурчак модул ичига жойланган тўртта камера жамланмаси бўлади.
Galaxy A52 5G, шунингдек, 3.5 мм аудио жекка эга бўлади. Қалинлиги эса 10 мм (камера бўртмасисиз 8.4 мм) бўлиши кутилмоқда. Ҳозирча смартфон вазни ҳақида аниқ маълумот мавжуд бўлмаса-да, сиздирилган рендерлардан кўриш мумкинки, қурилманинг орқа панели пластикдан, ён томон ромлари эса металлдан ишланган бўлади.
ЎҚИНГ: Exynos 2100 процессорли Galaxy S21+ ҳамда S21 Ultra флагманларини Geekbench’да таққослаб кўрсатишди!
