Samsung Galaxy Note 5 ва Galaxy Tab S2 учун Android 7.0 Nougat тайёрланмоқда
Бундан бир неча кун илгари Samsung Electronics компанияси Galaxy S6 ва S6 Edge учун Android 7.0 Nougat дастур версиясини тайёрлашни бошлаб юборгани тўғрисида сайтимизда хабар берган эдик.
Куни кеча Samsung билан алоқадор янгиликларни ёритувчи Sammobile сайтида пайдо бўлган маълумотга қараганда, Жанубий Корея технология гиганти Galaxy Note 5 ва Galaxy Tab S2 моделлари учун Android 7.0 Nougat версиясини яратиш устида ҳам иш олиб бормоқда экан.
Samsung Galaxy Note 5 ва Galaxy Tab S2 қурилмалари ҳам Galaxy S6 ва S6 Edge сингари 2015 йилда сотувга чиқарилган. Янги версия орқали юқоридаги гаджетлар Android 7.0 Nougat дастурининг деярли барча имкониятларидан фойдаланиш имкониятига эга бўлади.
Эслатиб ўтамиз, Android 7.0 Nougat версияси Samsung смартфонлари орасида биринчи бўлиб, жорий йилги флагманлар Galaxy S7 ва S7 Edge моделларига чиқарилади. Ҳозирча дастурнинг чиқиш санаси ноаниқ бўлса-да, аввалроқ унинг бета-синов босқичида эканлиги маълум қилинган.
