Samsung Galaxy Note20'ларга янгича процессор ўрнатилади
Ишончли манбалардан бирининг хабар беришича, Samsung ўзининг Exynos 990 чипини такомиллаштириш устида ишламоқда. Бу билан компания ўз процессорини Snapdragon 865 билан тенг даражага етказмоқчи. Янги версия SoC Galaxy Note20 оиласи смартфонларига қўйилади.
Агар ҳаммаси режадагидек кетса, Samsung флагман Galaxy Note20 моделларини август ойида тақдим қилади. Юқори тоифа смартфонларига Samsung'нинг 6 нанометрли жараён асосига қурилган Exynos 992 чипи ўрнатилади. Бу процессор Exynos 990'нинг янгиланган талқини бўлади.
Жанубий Корея, АҚШ ва Хитойдан бошқа бозорларда сотилаётган Galaxy S20 моделларига Exynos 990 чипи ўрнатилган. Exynos'ли бу қурилмалар Snapdragon'да ишловчи талқинларга қараганда кўп қувват сарфлаши маълум бўлгач, фойдаланувчилар томонидан анча танқидга учраган эди. Катта юклама остида Exynos'да ишловчи Galaxy S20 ва S20+ лар қизиб кетади.
Аммо янги Exynos 992'нинг тузилмавий архитектураси такомиллашган бўлади, бу эса ўз навбатида Snapdragon 865'дан кўра яхшироқ натижа ва камроқ энергия сарфини кафолатлайди. Жанубий Кореянинг ўзида сотилувчи Galaxy Note20 моделлари ҳам айнан Exynos 992 чипида ишлаши мумкин.
Qualcomm компанияси Snapdragon 865+ процессорини яратаётган бўлиши эҳтимоли бор. Аяна мана шу омил Samsung'нинг Exynos 992'ни яратишига туртки бўлган бўлиши мумкин. Акс ҳолда Galaxy Note20'ларнинг Snapdragon ва Exynos'да ишловчи вариантлари ўртасидаги тафовут янада кенгайиб кетади.
ЎҚИНГ: Samsung тўсатдан Galaxy Note 20’ни ўз сайтига чиқариб қўйди!
