Samsung Galaxy Note20'ларнинг iPhone 12'ларни ер тишлатадиган жиҳати нима бўлишини биласизми?

Samsung Galaxy Note20'ларнинг iPhone 12'ларни ер тишлатадиган жиҳати нима бўлишини биласизми?

Сиздирилган батафсил маълумотларга қараганда, тақдимоти августда бўлиб ўтувчи Samsung Galaxy Note20 смартфони ҳақиқий «йиртқич» флагман бўлади. Яна маълум бўлишича, Note20'нинг iPhone 12'дан афзал бир жиҳати бор.

Аввало, айтиш керакки, августда Samsung'дан иккита катта экранли смартфон кутиш мумкин. Улардан бири 6.42 дюймли Galaxy Note20, иккинчиси эса 6.87 дюймли Galaxy Note20 Plus. Note20 Ultra деган модель бўлмаслиги ҳақида яқинда хабар берганимиз ёдингизда бўлса керак. Аммо техноишқибозларни лол қолдирадиган жиҳат дисплей диагонали билан эмас, балки экраннинг остки томони билан боғлиқ.

«Дисплей таъминот занжири консультантлари» (Display Supply Chain Consultants) компанияси Бош ижрочи директори Росс Янгнинг яна маълум қилишича, Galaxy Note20 ва Note20 Plus смартфонлари Qualcomm'нинг янги 3D Sonic Max бармоқ изи сканерига эга бўлувчи илк қурилмалардан бўлади. Ушбу янги сканер Galaxy S20'нинг кичик датчигидан ўзгача ечим бўлади.

ЎҚИНГ: Samsung ҳали тақдим этилмаган, «яширин камера»ли Galaxy Note 20’ни энди «жонли» видеода кўрсатди!

3D Sonic Max бармоқ изи сканери ҳозирги сканерлардан 17 баробар каттароқ бўлади. Бу эса, тўғри тахмин қилдингиз, экран остининг анчайин катта қисми дегани. Бу билан қурилмани блокдан чиқариш учун бармоқ изи сканерининг аниқ жойлашувини қидириб юришга ҳожат қолмайди.

Qualcomm'дагилар пресс-релизда таъкидлашича, янги датчик «оширилган тезлик ва фойдаланиш қулайлиги»ни таъминлайди.

Apple ҳам экраности Touch ID устида ишлаётгани ҳақида миш-мишлар юрибди, аммо купертиноликларнинг бу янгилиги ҳали бери тайёр бўлмайди ва iPhone 12'га қўйилмайди. iPhone 12'да Face ID қолдирилади, кўриш бурчаклари кенгайтирилиб, ушбу биометрик хавфсизлик усули такомиллаштирилади.

Афсуски, кўпчилигимиз ёз ичи ва эҳтимолки, кузда ҳам ниқоб тақиб юрган бўламиз (бу ерда глобал миқёсда гап кетмоқда). Face ID эса ниқоб тақилган юзни танимайди. Бу масалага ечим сифатида Apple iOS 13.5'га янги функция қўшдики, агар юзингизга ниқоб тўсилганини кўрса, iPhone тезда PIN-код киритиш ойнасини очади.

Samsung'га қайтсак, 3D Sonic Max бармоқ изи сканери фойдаланувчига бир вақтнинг ўзида иккита бармоқ билан қурилмани блокдан чиқариш имконини беради. Баъзилар учун хавфсизликнинг бундай янги даражага кўтарилгани қувонарли ҳол, албатта.

Сиздирилган маълумотларга таяниб яна айтиш мумкинки, Note20'ларда оператив хотиранинг бошланғич сиғими 16ГБ бўлади. iPhone 12 Pro'да эса 6ГБ бўлиши кутилмоқда. Ҳар икки девайснинг экрани 120Hz янгиланиш частотасига эга бўлиши ҳам таъкидланганди, аммо iPhone 12 Pro'нинг бундай хусусиятга эга бўлиши айни дамда яна сўроқ остида турибди.

Буларнинг ҳаммасини қўшсак, Galaxy Note20 ва Note20 Plusлар Apple'нинг iPhone 12'ларини чангида қолдиришини тушуниб етамиз.

ЎҚИНГ: Samsung Galaxy Note20'ларга янгича процессор ўрнатилади

Хабарларни тез ва осон ўқиш учун Андроид иловамизни сақлаб олинг.