Samsung Galaxy S10 бир йўла учта версияда чиқади
Жануби Кореянинг The Bell нашри ёзишича, Samsung Galaxy S10 флагман версиялари бир йўла учта моделда намойиш этилади. (Note-версини қўшмаганда, албатта, чунки бу ҳақда гапиришга ҳали эрта). Базавий ва Plus-вариантларидан ташқари, компания ниҳоят, соддалаштирилган тавсифга эга, арзон флагманлар версиясини ҳам чиқарадиган бўлди.
Galaxy S10
Базавий «ўнлик» стандартли 5,8-дюймли, чеккаси қайрилган экран ва қўш камера билан таъминланади. Galaxy S10 Plus 6,44-дюймли дисплей ва учталик камерага эга. Агар ушбу маълумот тасдиқланса, у Samsung компаниясининг уч камерали илк модели бўлади. Бундан ташқари, иккала флагман ҳам экран остида бармоқ излари сканери билан жиҳозланиши керак. Шу вақтгача бундай смартфон Samsung’да йўқ эди.
Қурилманинг арзон варианти эса чеккаси қайрилмаган, 5-дюймли, бир камерали экран билан таъминланади. Кутилишича, ушбу қурилма компаниянинг бармоқ излари сканери ёнбош қиррада жойлашган илк смартфони ҳисобланар экан. Сканерни Qualcomm етказиб беради. Шунингдек, Galaxy S10 Plus’даги учталик камеранинг асосий сенсори 12 Мп бўлади.
Тарқалган хабарларга қараганда, ўнинчи авлод флагманлари келаси йилнинг февраль ойида Барселонада бўлиб ўтадиган MWC 2019 кўргазмасида омма эътиборига тақдим этилади ёки алоҳида тақдимот тадбири ҳам ўтказилиши мумкин.
