Samsung Galaxy S11e'нинг ҳам рендерлари пайдо бўлди
Galaxy S11'нинг компьютер ёрдамида яратилган рендерлари пайдо бўлганидан кўп вақт ўтмай Galaxy S11e'нинг ҳам рендерлари чиқди.
Ушбу тасвирлар расмий эмас, лекин Galaxy S11e қандай кўринишга эга бўлиши асосли тахминларга асосланган ҳолда кўрсатилган.
Смартфоннинг бир қарашда эътиборни тортадиган жиҳати марказда жойлашган айлана тириқишли селфи камерасидир.
Galaxy S10e'нинг давомчисига учинчи камера ҳам қўшилган. Бу телефото камеранинг бирор бир тури бўлиши керак. Яна бир асосий фарқ экраннинг бироз қайрилганидадир — Galaxy S10e'га текис панель ўрнатилган эди.
Қурилманинг ўнг ёнида қувват ва овоз баландлиги назорати тугмалари жойлашган. Эътибор берган бўлсангиз, қувват тугмасига бармоқ изи сканери ўрнатилмаган. Бундан чиқди, гаджетнинг бармоқ изи сканери экран остида бўлади.
11 февралда тақдим қилиниши кутилаётган Galaxy S11e дисплейининг диагонали 6.2 ёки 6.3 дюймли бўлиши керак, аккумулятор сиғими эса S10e'даги 3 100 мА/соатдан 4 000 мА/соатгача ошиши мумкин.
Флагманлигини ҳисобга олиб тахмин қилишимиз мумкинки, Galaxy S11e Snapdragon 865 ёки Exynos 990 чипида ишлайди, хотира сиғими эса 6/128ГБ, 8/256ГБ бўлиши эҳтимолдан ҳоли эмас.
Samsung Galaxy S11e'нинг ҳажми бироз кичик бўлади: 151.7 х 69.1 х 7.9 мм. Яъни бўйига Galaxy Note10 (Plus эмас) билан тенг, энига эса анчайин кичикроқ бўлади. Камера модулининг қандай линзалардан ташкил топиши ҳозирча ёпиқ китоб бўлиб турибди. Бироқ гаджетнинг асосий камераси 108 мегапикселли бўлиши эҳтимоли йўқ эмас, сабаби 108МП Galaxy S11 линейкасининг асосий урғу бериладиган жиҳати бўлиши кутилмоқда. Қолган иккита модул эса перископик бўлмаган телефото ва ультра кенг бурчакли линза бўлиши керак.
