Samsung Galaxy S22 Ultra тақдим этилди: Note дизайнидаги S смартфон

Samsung Galaxy S22 Ultra тақдим этилди: Note дизайнидаги S смартфон

Samsung кеча S22 Ultra моделини тақдим этди. Ушбу смартфон ўтган йилги S21 Ultra ҳамда 2020 йилги Note20 Ultra моделларнинг янги авлоди ҳисобланади. 

ЎҚИНГ: Xiaomi 12 Ultra'нинг аккумулятор сиғими ҳамда неча ваттда қувват олиши маълум бўлди 

Бир йиллик энг катта ўзгариш бу - Note серияси каби S22 Ultra корпусида стилус учун жой яратилди. 

Янги модель олд ва орқа панель, шунингдек, корпус ромлари билан Note20 Ultra'ни эслатиб юборади, айниқса, унинг Burgundy рангдагиси Note20 Ultra моделининг Mystic Bronze  рангдаги турига жуда ўхшайди. Орқа панелдаги камера модули ўтган йилги S21'никига ўхшаш, биргина фарқ модул корпусдан энди бўртиб чиқиб турмайди. 

Қурилма корпуси алюминийдан ишланган бўлиб, икки томондан Corning Gorilla Glass Victus+ шишаси билан ҳимояланган. Смартфон ва S Pen IP68 стандартига эга. 

Янги интеграцияланган S Pen янада тез ишлайди ҳамда сунъий интеллектга асосланган координаталарни башорат қилиш технологиясига эга бўлди. Samsung қўлёзмани матн қилиб ёзиш функциясини ҳам яхшилади ва энди у 88 та тилни қўллаб-қувватлайди. 

Янги тезкор эслатма функцияси браузер ва галерея каби қалқиб чиқувчи иловаларга қайдларни бириктириш имконини беради. 

Collaboration View функцияси эса S22 Ultra ва Tab S8 планшетлари ўртасидан синхронлаш амалини бажариш имконини яратади. Бу орқали Tab S8 планшетларида расм чизаётган вақтда фойдаланувчи S22 Ultra орқали турли хил мўйқаламларни танлаши мумкин бўлади. 

Galaxy S22 Ultra'га ўрнатилган дисплей аввалги моделнинг дисплейига ўхшаш. Қурилама 120Hz адаптив частота ҳамда 240Hz сенсорли намуна олиш частотасини қўллаб-қувватловчи 1440p резолюциядаги 6.8 дюймли Dynamic AMOLED 2X дисплейи билан жиҳозланган. Унинг максимал ёрқинлик даражаси 1750 нитни ташкил қилади. Экран остидан ультра товушли бармоқ изи сканери ўрин олган. 

Қурилмага f/1.8 диафрагмадаги 108МП асосий камера, f/2.2 диафрагмадаги 12МП ультракенг камера ҳамда 3х ва 10х оптик зумни қўллаб-қувватловчи иккита f/2.4 диафрагмадаги 10МП телефото камералар ўрнатилган. 

Олд панелдан f/2.2 диафрагмадаги 40МП селфи камера ўрин олган. Компания такомиллашган сунъий интеллектдан фойдаланган ҳолда янгиланган нейронга ишлов бериш бирлиги (NPU) билан тунги вақтда олинган сурат ва видеолар сифатини яхшилади, шунингдек, камерага янги функциялар қўшди. 

Янги Auto Framing функциясида смартфон ультракенг камерадан фойдаланган ҳолда фокусни кадрдаги одамлар сонига қараб созлаши мумкин. Камера ўнтагача одамни кузатади. Агар кадрга яна одам қўшилса, камера уларни ҳам фокус қамровига кирита олади. 

Samsung портрет режимини ҳам яхшилади. Энди камера объектни хиралашиш майдонидан янада яхшироқ ажратиб олади. Суратни ёрқинлигини таҳрирлаш учун янги студия ёритиш эффектлари ҳам қўшилди. 

Galaxy S22 Ultra ҳудудга қараб Exynos 2200 ёки Snapdragon 8 Gen1 чипи билан жиҳозланади. Иккала чип ҳам тўрт нанометрлик жараён асосида яратилган бўлиб, саккиз ядроли CPU дизайнига эга.

Snapdragon 8 Gen1 чипи Adreno 730 график процессори, Exynos 2200 эса AMD RDNA2'га асосланган Xclipse 920 график процессорига эга. Иккала чипининг сунъий интеллект бирлиги яхшиланган. Samsung'нинг таъкидлашича, янги NPU аввалгиларидан икки мартагача тезроқ ишлайди. 

Қурилманинг 8/128ГБ, 12/256ГБ, 12/512ГБ ҳамда 12ГБ/1ТБ хотирага эга турлари мавжуд. Android 12 операцион тизимига асосланган One UI 4.1 график қобиғида ишловчи смартфон 45 ваттда қувват олувчи 5,000 мАс сиғимли аккумуляторга эга. Бундан ташқари, уни 15 ваттда симсиз қувватлаш мумкин. 

Galaxy S22 Ultra модели Phantom Black, Phantom White, Phantom Green ҳамда Burgundy рангларда тақдим этилди. Шунингдек, Graphite, Red ҳамда Sky Blue рангдаги смартфонларни Samsung.com сайтидан сотиб олиш мумкин. Қурилмага олдиндан буюртма бериш кечадан бошланди. Улар 25 февраль санасидан бошлаб етказиб берилади. 

Смартфоннинг нархи (8/128ГБ) 1199 доллардан бошланади. 

ЎҚИНГ: Nubia Red Magic 7 смартфонининг тақдимот санаси маълум бўлди 

Хабарларни тез ва осон ўқиш учун Андроид иловамизни сақлаб олинг.