Samsung Galaxy S23'нинг техник жиҳатлари ва қадоқ таркиби билан танишамиз
Дунёдаги энг яхши кичик смартфонлардан бири бўлган гаджет янада такомиллашди - Galaxy S23 энди янада тез, янада мустаҳкам ва янада самарадор кўрсаткичларни таклиф этади. Смартфон кичик, енгил ва жуда жозибадор. У катта эҳтимол билан кичик смартфонлар сегментида энг оммабоп қурилмага айланади.
S23 моделининг дизайни бироз ўзгарди. Орқа панелдаги камерани бирлаштириб турувчи модул энди йўқ. У ердаги уч камера энди алоҳида камера бўлиб ажралиб туради. Шунингдек, орқа ва олд панель янада мустаҳкамдоқ бўлган Gorilla Glass Victus 2 ойнаси билан ҳимояланган.
Смартфон 1080p резолюциядаги 6.1 дюймли Dynamic AMOLED 2X дисплейи билан жиҳозланган бўлиб, у 120 герц частотада ишлайди. Максимал ёрқинлик даражаси 1300 нитдан 1750 нитга ошди.
Анчадан буён Samsung ўзининг S флагманларни ҳудудга қараб Exynos ва Snapdragon чиплари билан жиҳозлар эди. Бу анъанага бу йил барҳам берилди. Аниқроқ қилиб айтганда, қайси ҳудудга мўлжалланганлигидан қатъий назар барча S23 моделлари Snapdragon чипига эга бўлди.
Яна бир қувонарли томони, Snapdragon 8 Gen2 чипи S23 серияси учун мослаштирилди. Энди чипнинг CPU ва GPU қисмларининг унумдорлик даражаси ошди. Ўз навбатида янги моделлари янги авлод хотира чипларига эга бўлди.
Орқа панелдаги камералар техник кўрсаткич бўйича ҳеч қандай ўзгаришга учрамаган. У ердан 50МП асосий, 3х зумли 10МП телефото ҳамда 12МП ультракенг камера ўрин олган. Олд панелдаги 12МП камера энди Супер HDR функциясини қўллаб-қувватлайди. Шунингдек, унда ҳамон 4K форматда видеога олиш имконияти мавжуд.
Аккумулятор сиғими 200 мАс га ошди - 3,900 мАс. Қувватлаш тезлигида ўзгариш йўқ - 25 ватт. Қурилма симсиз қувватланиш ва ўзидан қувват бериш имкониятларига эга.
Қисқа қилиб айтганда, ёрқинроқ дисплей ва каттароқ сиғимли аккумуляторга эга S23'ни эски S22 моделининг тезкор версияси дейиш мумкин.
Samsung Galaxy S23'нинг техник жиҳатлари:
> Корпус: 146.3х70.9х7.6мм, 168г; олд панель (Gorilla Glass Victus 2), орқа панель (Gorilla Glass Victus 2), алюминий корпус; IP68.
> Дисплей: 6.10 дюймли Dynamic AMOLED 2X, 120 герц, HDR10+, 1750 нитс (максимал), 1080х2340 пиксел резолюция, 19.5:9 форма фактори, 422ppi зичлик.
> Чипсет: Qualcomm SM8550-AC Snapdragon 8 Gen 2 (4 nm): Саккиз ядроли (1x3.36 GHz Cortex-X3 & 2x2.8 GHz Cortex-A715 & 2x2.8 GHz Cortex-A710 & 3x2.0 GHz Cortex-A510); Adreno 740.
> Хотира: 8/128ГБ, 8/256ГБ, 8/512ГБ; UFS 3.1 ( фақат 128ГБ хотира учун); UFS 4.0.
> ОТ/Дастурий таъминот: Android 13, One UI 5.1.
> Камера: Асосий камера: 50 МП, f/1.8, 24мм, 1/1.56“, 1.0µm, қўш пиксел PDAF, OIS; Телефото камера: 10 МП, f/2.4, 70мм, 1/3.94“, 1.0µm, PDAF, OIS, 3х оптик зум; Ультракенг камера: 12 МП, f/2.2, 13мм, 120˚, 1/2.55“ 1.4µm, Super Steady видео.
> Селфи камера: 12 МП, f/2.2, 26мм (кенг), қўш пиксел PDAF.
> Видео ёзув: Асосий камера: 8К@24/30fps, 4К@30/60fps, 1080p@30/60/240fps, 720p@960fps, HDR10+, стерео овоз ёзиш, gyro-IES; Селфи камера: 4К@30/60fps, 1080p@30fps.
> Аккумулятор: 3,900 мАс; 25 ватт қувватлаш технологияси, 50% - 30 дақиқада (рекламага кўра), симсиз қуввланиш имконияти, 4.5 ватт ўзидан қувват бериш имконияти.
> Бошқа: Бармоқ изи сканери (экран соатида, ультра товушли), NFC, стерео динамик, Samsung DeX.
Хулоса қилиб айтганда, янги S23 моделини S22 билан таққослаганда ундаги кичик ўзгаришларни кўриш мумкин. Энг катта ўзгариш Snapdragon 8 Gen2 чипи бўлса, кичик ўзгаришларга экраннинг ёрқинлик даражасини ошгани ҳамда аккумулятор сиғимини ошганини мисол қилиб кўрсатиш мумкин.
Қадоқ таркиби
Смартфон ингичка қутида келади. Унинг ичида смартфондан ташқари, USB-C кабели ва SIM-карта игнаси бўлади холос. Қуввлаш адаптерини қўшимча маблағ эвазига сотиб олиш керак бўлади.
ЎҚИНГ: Samsung ва BMW ишқибозлари учун янги смартфон тақдим этилди
