Samsung Galaxy S7: экрани, ўзига хосликлари ва рақиблари

Samsung Galaxy S7: экрани, ўзига хосликлари ва рақиблари

Galaxy S7 икки хил – 5.2 ҳамда 5.8 дюймли ўлчамда тақдим этилади. Улардан бири 4K технологияли дисплейга эга бўлади. Бошқа бир манбаада экраннинг 1440×2560 пикселли QHD стандартида бўлиши айтилган. Бу янгилик Samsung Galaxy Note 5 ва Samsung Galaxy S6 Edge+ қурилмаларида мавжуд бўлса ҳам, унинг S7’нинг планшет талқинида қўлланилиши қойилмақом бўлиши аниқ.

The Wall Street Journal нашрида Samsung компанияси янги қурилма экранида ҳали номи маълум бўлмаган технологияни қўллаш юзасидан тадқиқотлар олиб бораётгани тўғрисида ёзилган.

Кореянинг бошқа бир нашрида ёзилишича, компания Тайвандаги экран ишлаб чиқарувчи корхонага катта миқдордаги қайрилма экранга буюртма берган экан. Демак, Galaxy S7 букри экранли бўлиши ҳам мумкин.

Samsung “Turtle Glass” номли дисплей брендини Корея Интеллектуал патент идорасидан рўйхатдан ўтказган. Galaxy S7’да бу инновациядан фойдаланилиши 2015 йилдаёқ тахмин қилинган эди.

Ҳатто компаниянинг буклама телефон қуримасини тақдим этиши хусусида ҳам гап-сўзлар қулоққа чалинмоқда. Лекин компаниянинг синамасдан туриб бунга таваккал қилиши шубҳали.

Samsung Galaxy S7 рақобатчилари

Сўнгги йилларда HTC компаниянинг муносиб рақобатчисига айланмоқда. HTC One M10 қурилмасининг Samsung Galaxy S7’нинг рақиби бўлиши кутилмоқда. Кўпчиликка маълум бўлмаса ҳам, дизайн ва имкониятлари жиҳатидан HTC’нинг бу аппарати кўпчиликни ҳайрон қолдирмоқда.

iPhone 6S ва iPhone 6S Plus, Sony Xperia Z6 мобиль алоқа воситалари ҳам одамларнинг диққатини тортмоқда.

Samsung Galaxy S7 камера ва аккумулятор

Компаниянинг Britecell камераси ёруғлик паст ҳолатда ҳам сифатли сурат олади. Шунингдек, у Galaxy S6’нинг камерасидан ихчамроқ. S7 шу камера билан таъминланса ажаб эмас. Аммо компаниянинг Sony’нинг Xperia Z5 қурилмасида мавжуд 25 мегапикселли  IMX30 сенсор камерасини ишлатишни ҳам режалаштирган.

Galaxy S6’да 16МП камера мавжуд бўлса, Galaxy S7’га 12МП камера ўрнатилиши ҳақида ҳам миш-мишлар юрибди.

Таниқли AnTutu стандартларни аниқлаш тизими томонидан Samsung Galaxy S7 телефони сифатида таништирилган аппаратда 16 мегапикселлик орқа, 5 мегапикселлик олд камера мавжуд.

Samsung’нинг навбатдаги авлодида iPhone 6S’дагидек кетма-кет олинган бир нечта фотосуратлардан иборат “Live Photos” технологияси қўлланилади. GIF – тасвирни алмашиш форматига ўхшаш бу функцияда суратлар айфондан фарқли равишда овозсиз ёзиб олиниши тахмин қилинмоқда. Бу эса уларни ижтимоий тармоқ ва мессенжерларда улашиш имконини оширади.

Қўл телефонига ажралмайдиган қувват тоши (батарея) ўрнатилиши мумкин. S6’да бир марталик қувватдан кейин 17-18 соат фойдаланиш имконияти мавжуд. Янги телефонда бу вақт янада узайиши мумкин.