Samsung Galaxy S7: компания “қарта”ларини оча бошлади
Samsung ниҳоят Samsung Galaxy S7 гаджетига оид баъзи маълумотларни ошкор қила бошлади. Хусусан, қурилманинг сув таъсирига чидамлилиги ўз тасдиғини топди. IP68 рақамли гувоҳнома тасодифан сувга тушиб кетган қурилманинг ўз-ўзини ҳимоя қила олишини кафолатлайди.
Шунингдек, компания томонидан янги мобиль алоқа воситасининг икки четки, соҳил дисплейларига эга талқининг бўлиши ҳам айтилган. Демак, унинг кўпчиликни мафтун қилган Samsung’нинг Galaxy S6 ҳамда Galaxy S6 Edge қурилмаларининг кейинги авлоди дейиш мумкин.
Samsung’га яқин манбаанинг The Korea Times нашрига берган маълумотига кўра, S7 қурилмаси суратга олиш ва тасвир намойиши жиҳатидан юқори имкониятга эга бўлади.
Компания Galaxy S7 Edge талқинини тақдим қилса ҳам, унинг ўрнига кейинчалик 5.7 дюймли диагонал, 2K технологиясидаги дисплейга эга Galaxy S7 Edge+ планшетини оммалаштиришни режалаштирган.
Samsung Galaxy S7 экранининг диагонали 5.7 дюйм бўлиши кутилмоқда. Бу шу турдаги қурилмалар билан солиштирганда, анча катта ўлчам. QHD туридаги дисплейнинг пикселлар сиғими 1440 x 2560 бўлиб, ҳар квадрат дюйм 500 та пиксель сиғимига эга. Бу турдаги монитордан илк маротаба Galaxy S5 гаджетида фойдаланилган эди.
Компаниянинг дастурий маҳсулотлар инжиниринги бўйича мутахассисининг айтишича, iPhone 6S’даги каби, Samsung ҳам навбатдаги қурилмасида суратга олишнинг янги формати бўлган “Live Photos” яъни, GIF-анимациялар ёрдамида бир неча суратлардан ҳаракатли тасвир ҳосил қилиш технологиясини ҳам жорий қилади. Фақат “Vivid Photos” деб номланиши кутилаётган янги технология овозсиз ва уни осон юклаб олиш мумкин бўлади.
Samsung ходимларидан бири Galaxy S7’нинг бош камераси 12МП бўлишини айтган. Galaxy S6’да эса 16МП камера мавжуд.
Samsung Galaxy S7 гаджети Android Marshmallow операцион тизимида бўлиши айтилган. Аммо компаниянинг қурилмага мўлжалланган янги “Jungfrau” операцион тизимини эълон қилиши тўғрисида ҳам гап-сўзлар юрибди.
Samsung_Galaxy_S6
Янги смартфон “жиддий” аудио қобилиятларга эга бўлиши ҳақидаги гап-сўзлар шунчаки фойдаланувчилар диққатини тортиш учун чўпчак эмаслиги аниқ. Чунки, компания унда 32-бит мобиль аудио узатиш имконига эга ESS Technology чипи, 129 децибел шовқин чиқариш имконига эга аудио процессордан фойдаланишни режалаштирган. Бу эса овознинг баланд ва тиниқлигини таъминлайди.
Қурилманинг USB Type-C порти уни тезкор қувватлантириш учун ҳам хизмат қилади ва унга уланиш йўлаги доира шаклида бўлади.
Galaxy S6’дан фарқли равишда янги гаджетга унинг эгаси мустақил равишда қўшимча microSD хотираларни ҳам ўрнатиши мумкин.
Ҳозирча “самсунгшунос” эксперт ва таҳлилчилар янги смартфоннинг $650 доллардан сотилишини тахмин қилишмоқда. Барчаси билан батафсил 21 февраль куни Барселонада ўтадиган Жаҳон мобиль алоқа конгрессида ўтадиган намойишдан сўнг билиб оламиз.
