Samsung ҳали тақдим этмаган арзон смартфон – «ваттомонстр» аллақачон онлайн дўконга чиқди!
Бугун Samsung компаниясининг Galaxy M11 смартфони ҳақидаги бир хушхабарни улашган эдик. Энди эса ушбу арзон моделларнинг навбатдагиси хусусиятлари ошкор бўлди.
ЎҚИНГ: Samsung Galaxy A41'нинг рендерлари билан танишинг
Хулласи калом, Samsung келаси ҳафта яна бир арзон смартфон – Galaxy M21 моделини Ҳиндистонда расман намойиш этади. Amazon онлайн платформаси эса аллақачон унинг реклама саҳифасини ишга туширган.
Интернет-дўкон ҳали расман намойиш қилинмаган Galaxy M21 моделининг асосий хусусиятларини ошкор этган. Асосийси – компания уни «ваттомонстр» деб мақтаган: смартфоннинг аккумулятори 6000 мА/соатлик бўлиб, 15 ваттлик технология бўйича тезкор қувват олади.
ЎҚИНГ: 2020 йилнинг энг бестселлер смартфонларидан бири мана шу ҳамёнбоп модел бўлади!
Бошқа жиҳатларига келсак, Galaxy M21 диагоналига 6,4 дюймлик Super AMOLED экран билан жиҳозланади. Тасвир аниқлиги Full HD форматидаги дисплейнинг юқорисидаги томчисимон кемтикка 20 мегапикселлик олд камера ўрнатилади. Орқа панелдаги бош камера эса 48 + 8 + 5 мегапикселлик учта модулни ўз ичига олади.
Samsung ушбу қурилмасида ўзининг Exynos 9611 чипсетини қўллаган; смартфон тезкор/ички хотираси 4/64 ва 6/128 гигабайтлик вариантларда таклиф этилади. Афсуски, уларнинг нархлари ҳозирча айтилмаган, бироқ олдинги тахминларга кўра, 200 АҚШ доллари атрофида бўлиши керак.
Дарвоқе, смартфоннинг рекламасида «WattaMonster» дея сўз ўйини қилишган. Бу ерда инглизча «What a monster» – «Қандай монстр» сўзига «Watt» – ватт сўзини қўшиб юборишган. Демак, унинг «қанақа махлуқ» экани душанба куни янада ойдинлашади, воқеаларни бирга кузатамиз.
ЎҚИНГ: Анонс яқин: ҳамёнбоп Galaxy A31 аллақачон Samsung расмий сайтига чиқди!
