Samsung ҳам «ғишт» смартфон тайёрлаяпти, тағин буклама экранли!
Жанубий кореяликларнинг Galaxy Fold буклама смартфони анчагина шов-шувлар билан тақдим этилган эди. Аммо у компания учун шунча машмашалар ҳам олиб келди.
ЎҚИНГ: «Инқилоб» амалга ошмади: Samsung барча Galaxy Fold’ларини қайтариб оляпти!
Аммо Samsung қўлини ювиб қўлтиққа ургани йўқ – шу кунларда Galaxy Fold смартфонлари савдоси қайтадан бошланаётгани ҳақида хабарлар чиқмоқда. Компания ундан ташқари яна бир антиқа қурилма учун ҳам патент олгани маълум бўлди.
Samsung компанияси 7 май куни Бутунжаҳон интеллектуал мулк ташкилоти (World Intellectual Property Organization – WIPO)га патент аризаси топширгани маълум бўлган. Унда анчагина ғайриоддий буклама қурилма тасвирланган.
Ёйилган ҳолатида у томонлари ўзаро 16:9 нисбатли улкан планшетни эслатади. Мазкур қурилма дисплейи ташқарида қолган ҳолда букилиб, параллелепипед шаклига келади!
Мазкур девайс букилган (аниқроғи – ўралган) ҳолида унинг тўртта томонидаги экранларида турли маълумотлар акс этиб туриши мумкин. Аммо бунчалик бесўнақай гаджетни ҳеч ким чўнтагида кўтариб юрмаса керак, афтидан, Samsung уни столга қўйиб қўйишга мўлжаллаган.
Samsung ушбу патентини амалда қўллаб, «ғишт» девайсни чиқариш-чиқармаслиги номаълум, лекин кузатувчилар фикрича, компания уни яратишда рекорд аккумуляторли Energizer Power Max P18K Pop смартфонидан илҳомланган.
ЎҚИНГ: Дунёдаги энг чидамли смартфон ҳеч кимга кераксиз бўлиб чиқди!
