Samsung ҳам Redmi Note 9 Pro Max нархида «автономлик монстри»ни сотувга чиқарди

Xiaomi корпорацияси кеча ўзининг Redmi Note 9 Pro Max смартфонини тақдим этган эди. Бундан ташқари, компания унинг янада арзон версияси – Redmi Note 9 Pro моделини ҳам намойиш қилган.

ЎҚИНГ: Xiaomi’нинг ушбу смартфонига келган янгиланиш уни «ғишт»га айлантирди

Samsung арзон смартфонлар бозорига бирданига кириб келаётган бу икки рақобатчига муносиб жавоб беришга қарор қилди. Лекин у янги модел тақдим этмасдан, Galaxy M30s смартфонини янгича конфигурацияда чиқарди.

Galaxy M30s ўтган йилнинг сентябрида намойиш этилган бўлиб, энг сиғимдор – нақ 6000 мА/соатлик батареяга эга арзон Samsung смартфони сифатида ном қозонган. Шу пайтгача компания уни тезкор/ички хотираси бўйича икки хил – 4/64 ва 6/128 гигабайтлик конфигурацияларда чиқариб келмоқда.

Энди эса – «Хитойча Apple» янги моделларини тақдим этгач, Samsung ҳам ғимирлаб қолди: 14 мартдан бошлаб у Galaxy M30s моделини янгича талқинда чиқаряпти. Унинг «оперативка»си 4, доимий хотираси эса 128 гигабайтлик бўлиб, 200 долларга нархланган. Айтиш керакки, Redmi Note 9 Pro Max моделининг бошланғич – 6/64 ГБлик версияси айнан шундай нархга эга, Redmi Note 9 Pro эса ундан ҳам арзон.

ЎҚИНГ: Samsung ҳали тақдим этмаган арзон смартфон – «ваттомонстр» аллақачон онлайн дўконга чиқди!