Samsung ҳарбий даражада қаттиқ ҳимояланган Galaxy Tab Active 4 Pro планшетини тақдим қилди
Афсуски, ҳозирги нозик ва нафис дизайнда чиқарилаётган мобил қурилмлар офисдан ташқарида, турли хил шароитларда ишловчилар учун муқобил вариант бўла олмайди. Жанубий Кореянинг Samsung компанияси ушбу муаммога ўзининг янги Galaxy Tab Active 4 Pro планшети билан жавоб берди. Ортиқча дабдабаларсиз тақдим қилинган қурилма ҳарбий даражадаги қаттиқ ҳимояланган бўлиб, у экстремал шароитлар учун АҚШ ҳарбий кучларининг MIL-STD-810H сертификатига, шу билан бирга, сув ва чангга чидамлилиги учун IP68 рейтинггига эга. Айтиш керакки, планшет 1-1.2 метр баландликдан тушиб кетишдан ёки 1.5 метр чуқурликдаги сувда ярим соатлаб қолиб кетишдан "қўрқмайди".
Маълум бўлишича, 242.9х170.2 мм ўлчам ва 10.2 мм қалинлик билан атиги 674 грамм оғирликдаги Galaxy Tab Active 4 Pro планшети 10.1 дюймли, 1920х1200 резолюциядаги TFT LCD дисплейга эга. Экран тирналиш ва шикастланишга чидамлилиги билан бошқа кимёвий жиҳатдан мустаҳкамланган ойналардан устун турадиган Corning Gorilla Glass 5 билан ҳимояланган бўлиб, у 2 миллиметр қалинликдаги чарм қўлқопда тегинишни ҳам сеза олади. Камераларга келадиган бўлсак, планшет автофокус билан 13 мегапикселли (Ф1.9) асосий орқа камерага ва 8 мегапикселли (Ф2.0) селфи камерага эга.
Капот остида қурилма саккиз ядроли процессор (Snapdragon 778G чипсети) билан 4/64 ГБ, 6/128 ГБ хотира конфигурациясияларига эга. Албатта, планшет учун бу хотира камлик қилиши мумкин, лекин уни 1 ТБ гача microSD карта билан кенгайтириш мумкин. Маълумотларга кўра, планшет Android 12 га асосланган One UI қобиғида ишлайди ва у уч йиллик дастурий таъминот янгиланиши (Android 15 гача) ва беш йиллик хавфсизлик янгиланишларини қабул қилади.
Алоҳида таъкидлаш жоизки, Galaxy Tab Active 4 Pro планшети 7,600 мА/с батареяга эга ва уни олиш ва ўрнига бошқасини қўйиш мумкин, яъни қурилма батареясини алиштириб ишлатиш мумкин. Бу билан сиз қурилма зарядланиб олиниши кутиб ўтирмайсиз ва шартта янги батареяни қўйиб, ишлашда давом этаверасиз. Бироқ, сиз яна бир батареяни алоҳида сотиб олишингиз керак. Қўшимчасига, планшетни ҳеч қандай батареясиз ташқи қувват манбасига улаган ҳолда ишлатиш мумкин.
Алоқа ва уланиш борасида планшет 5G, Wi-Fi 6, НФC, Bluetooth 5.2 хусусиятларига ва USB-C портига эга. Бундан ташқари қурилмада иккита микрофон, сезиларли даражада баланд овоз чиқарувчи карнайлар, исталган иловани биргина босиш билан очиш учун созлаб олса бўладиган тугма, бармоқ изини аниқлаш хусусиятига эга Ёқиш (Power) тугмаси ва FaceID ҳам мавжуд.
Galaxy Tab Active 4 Pro сентабрда (аниқ сана ва нархи ҳозирча маълум эмас) Осиё, Лотин Америкаси, Шимолий Америка, Яқин Шарқ ва айрим Европа мамлакатларида сотувга чиқарилади. Планшет қутида S Pen ва уни ушлаб турадиган жойига эга ҳимоя ғилофи билан келади.
ЎҚИНГ: Apple ҳам ўзининг бир нечта эски смартфонларига янгиланиш юборди
