Samsung иккита арзон ва «бели бақувват» смартфонини кучайтириб чиқарди

Samsung яқинда ўрта нархли иккита смартфонини 5G-модемли версияда, яна биттасини эса глобал бозор учун ўзгача дизайнда чиқарган эди. Энди эса у арзон Galaxy M туркумининг иккита вакилини Россия бозори учун бошқача талқинда намойиш қилди.

ЎҚИНГ: Samsung роса мақтаган арзон смартфон «ғишт»га айланиб қоляпти!

Ёдингизда бўлса керак – Samsung Electronics ўтган ойда «Ваттомонстр» лақабли Galaxy M21 смартфонини Ҳиндистонда тақдим этган эди. Ушбу моделнинг Россия бозори учун чиқарилган версияси контактсиз тўловларни амалга ошириш имконини берувчи NFC чипига эга.

Россияликлар аллақачон Galaxy M21 смартфонини қора, кўк ва феруза рангли корпусларда сотиб олишлари мумкин. Унинг тавсия этилган нархи 15 990 рубль бўлиб, бу тахминан 215 АҚШ долларига тўғри келади.

ЎҚИНГ: Бу ҳамёнбоп смартфон DxOMark тестида Samsung’ни шарманда қилди!

Samsung ўтган ойнинг охирида мазкур туркумнинг яна бир вакили – Galaxy M11 смартфонини ҳам намойиш қилган. Компания уни ҳам Россияда фақат битта ўзгариш билан – NFC модули қўшилган версияда қайтадан тақдим этди.

Galaxy M11 сотувга 20 апрелдан, қора, бинафша ранг ва феруза рангли корпусларда чиқади. Унинг тавсия қилинган баҳоси 10 990 рублга, яъни тахминан 148 долларга тенг.

Юқоридаги иккала смартфон ҳам, NFC чипини айтмаса, ўзларининг Ҳиндистон версияларидан фарқ қилмайди. Samsung уларнинг автоном ишлаш вақти юқорилигига, яъни аккумулятор қуввати кўп вақтга етишига урғу бермоқда.

ЎҚИНГ: ТераТаққос: Redmi Note 8 ҳамда Galaxy A20s смартфонларини очиб, ишлатиб кўрамиз