Samsung илк чоракда рекорд даражада Galaxy S8 сотмоқчи
Samsung ўз олдига ғоятда улкан мақсадни қўйди: маълум бўлишича компания кейинги 3 ой ичида 18 млн дона Galaxy S8 ва Galaxy S8 Plus смартфонларини сотишни режа қилган. Galaxy S7’нинг 3 ойлик савдоси билан таққослаб кўрганда, бу 2 баробар кўп дегани. Айтиш жоизки, таҳлилчиларнинг ҳисоб-киобларига кўра, ҳатто Apple ҳам бир чорак ичида ўзининг энг оммалашган iPhone 7 ва iPhone 7 Plus смартфонларидан 10 миллион дона сотишга муваффақ бўлган.
Аввалига ўз флагманларининг омадига бир оз ишонқирамаган Samsung компанияси Galaxy S8 ва Galaxy S8+ гаджетларидан илк чоракда 16 млн донага яқин сотишни ўйлаб юрган эди. Аммо, етказиб берувчи дилерларнинг ижобий муносабати ва харидорларнинг юқори қизиқиши боис, кореялик ишлаб чиқарувчи ўз таҳлилларига қайта назар солди.
Samsung, шунингдек янги смартфоннинг юқори талқинига бўлган талабни ҳам ўрганиб чиқиб, S8 туркумида ишлаб чиқариш кўзда тутилган Galaxy S8 ва Galaxy S8+ ўртасидаги ўзаро нисбатни ҳам 55/45 фоизга қайта тақсимлаган. Аввалига бу туркумда ишлаб чиқарилиши белгиланган Galaxy S8+ миқдори 40 фоизни ташкил қилган.
Таҳлилчиларнинг фикрича, 1 йил ичида камида Samsung Galaxy S8 туркумидаги 50 млн дона смартфон сотилади. Бу эса Galaxy S7’нинг шу давр ичидаги савдосидан 1 миллион донага кўп дегани. Galaxy S8’нинг “аждоди”га нисбатан ниҳоятда инновацион экани ҳисобга олинса, 50 млн дона — бу жуда кам. Galaxy S7’нинг кўп сотилиш сабаблари оддий: ўтган йилги флагманлар авлоди Galaxy S8 смартфонига нисбатан 1 ой аввал намойиш қилинган. Қолаверса, Galaxy Note 7 планшетофонининг омадсизлигидан сўнг, Samsung Galaxy S7 савдоси ҳам кўтарилиб кетди. Ўта илғор Note 7 харид ққилишни режа қилганлар ноилож Galaxy S7 сотиб олишга мажбур бўлдилар.
