Samsung илк марта iPhone'дан тезкор бўлади
Ice Universe инсайдери янги авлод гелекси флагманларида татбиқ қилиниши кутилаётган Exynos процессорининг ўзига хосликларини маълум қилди. Мазкур чип биринчи бўлиб кейинги йил тақдим қилинувчи Samsung Galaxy S10 смартфонига ўрнатилади.
Ice Universe тарқатган маълумотга кўра, Samsung Galaxy S10 флагмани Exynos 9820 процессорига эга бўлади. Мазкур чипсет Samsung Galaxy S9 моделида ўрнатилган Exynos 9810 чипининг "меросхўри"дир. Янги авлод флагманидаги график-тасвирларни қайта ишлаш учун Mali-G76 видео картаси масъул бўлади..
Exynos 9820 — бу саккиз ядроли процессор бўлиб, унда иккита Exynos M4 ядролари, тўртта Cortex-A55 ядролари ҳамда иккита Cortex-A75 ёки A76 ядролари бўлади. Exynos M4 ядроси Samsung томонидан ишлаб чиқилган шахсий технологик ечим бўлиб, Cortex-A76 ядросининг ўрнини эгаллайди.
Самарадорликни ўлчайдиган имтиҳонларда бу ядро Cortex-A76 ядросидан кўпроқ балл тўплашга муваффақ бўлган. Бироқ, унинг натижалари iPhone X эга бўлган Apple A11 процессоридан ҳозирча паст. Бироқ, чипни такомиллаштириш ишлари якунланса, натижа кутилганидан юқори бўлиши мумкин.
Янги график процессор бўлмиш Mali-G76 — бу сўнгги ва кучли ARM чип ҳисобланади. 7 нанометрли техник жараёнга эга ушбу ишланма аждодидан тезкор ҳамда ундан кўра камроқ қувват истеъмол қилади.
Маълумотларга қараганда, Samsung ўзининг шахсий график процессорини ишлаб чиқариш учун ҳам катта маблағ сарфлаган. Samsung, Qualcomm ҳамда Apple компаниялари ҳозирча смартфон ишлаб чиқаришда ўзларининг график чипларидан фойдаланадилар.
Агар кореялик IT-гигант смартфонларида шахсий процессор ва видео картадан фойдаланадиган бўлса, бу унинг смартфонларидаги дастурий ва аппарат таъминотини мувофиқлаштириш орқали девайслардаги самарадорликни оширишга хизмат қилади. Apple айнан шунинг учун ҳам энг тезкор мобил платформа яратишда яққол пешқадам.
