Samsung iPhone’нинг энг кучли жиҳатини айтди
Бугун Android мобил платформасига ҳужум уюштираётган вируслар жиддий муаммога айланди. Samsung компанияси айнан шу туфайли ҳам ҳимоя дастурлари ишлаб чиқарадиган McAfee компанияси билан Galaxy S8 ва S8+ учун VirusScan тизимини яратиш бўйича ҳамкорликни бошлади.
Android-қурилмалар ишлаб чиқарувчи Samsung компанияси Android-смартфонларнинг тобора кучайиб бораётган вирус хавфлари олдида ожизлигини очиқчасига қайд этган. Шу билан бирга, компания вакили iPhone’нинг зарарли файллардан нақадар кучли ҳимоялангани, «гуглофон» эгалари смартфонларига кириб олиб, банк карталаридаги маблағларни ечиб олаётган, махфий сўзларни ўғирлаётган троян вирусларининг қурбонига айланиб қолмасликлари учун, антивирус дастурларидан фойдаланишга мажбур эканликларини қайд этган.
Албатта, Google доим Android фойдаланувчиларни ташвишга ўрин йўқлигига ишонтириб келади. Бир неча йиллар аввал Google компанияси вируслар Google Play’га тушиши билан уларни аниқлайдиган тизим татбиқ қилинганини айтган бўлса ҳам, бироқ вирус хуружларининг хавфи камайгани йўқ. G Data маълумотларига кўра, ҳар 10 секундда Android мобил платформаси учун янги троян вируси ишлаб чиқарилиб, тарқалмоқда.
