Samsung iPhone7’ни “синдириш” учун Galaxy Note7 анонсини тезлаштирган
Бугун Sammobile нашрида келтирилган хабарда айтилишича, Жанубий Кореянинг Samsung Electronics компанияси 2016 йил сентябрь ойида тақдим этилиши кутилган Apple iPhone7 моделини “синдириш” мақсадида Galaxy Note7 фаблетининг анонсини, жумладан, фаблетда ишлатилган Samsung SDI батареяларининг ишлаб чиқилишини ҳам тезлаштирган.
Bloomberg нашрининг ёзишича, кореялик гигант бу йилги янги Apple моделларига аҳамиятли инновациялар татбиқ этилмаслигини олдиндан прогноз этган ва буни кучли техник янгиликларга бой Galaxy Note7 фаблетини тақдим қилиш учун жуда қулай фурсат деб ҳисоблаган. Samsung’нинг янги Note сериясидаги фаблети икки тарафлама ён экран, кўз ёй пардаси сканери, USB Type C каби илғор технологияларга эга. Шунингдек, фаблетнинг батареяси ҳам аввалги моделларга қараганда йирикроқ бўлиб, тезкор зарядлаш функциясини қўллаб-қувватлайди. Жанубий Кореялик гигант ушбу инновацион фаблетнинг Apple iPhone7 соясида қолиб кетмаслигини таъминлаш учун унинг тақдимот санасини ҳам бир неча кун олдинга суришга қарор қилган.
Бироқ Galaxy Note7 батареясидаги носозлик туфайли вазият кутилмаган тус олган. Корейс компаниясининг биржа фондидаги қиймати ушбу муаммо туфайли икки кунда 22 млрд долларга арзонлашган, бренднинг жаҳондаги нуфузига жиддий путур етган. Натижада аввалдан кўзланган мақсадга барибир етиб бўлмади: батареядаги носозлик туфайли компания Galaxy Note7 смартфонларини чақириб олишга мажбур бўлди, унинг глобал савдолари ҳали тўлиғича йўлга қўйилмади. Apple’нинг iPhone7 ва iPhone7 Plus моделлари эса жаҳон савдоларида яна рекордларни янгилашда давом этмоқда.
