Samsung компанияси Galaxy Note 7’ни бозорга қайтаради

Samsung компанияси Galaxy Note 7’ни бозорга қайтаради

Samsung компанияси бир муддат аввал аккумулятордаги носозликлари туфайли ёниб кетиш ҳолатлари кўп учраган ва ишлаб чиқарилиши тўхтатилган Galaxy Note 7 смартфонини смартфон бозорига қайта олиб киришни режа қилмоқда. Бу тўғрида Жанубий Кореянинг Hankyung нашри хабар тарқатган.

Маълум қилинишича, ишлаб чиқарувчи Galaxy Note 7 девайсига янги, 3000 ёки 3200 миллиампер-соат қувват сиғимига эга аккумуляторларни ўрнатади. Аввалги қувват тошларининг сиғими 3500 миллиампер-соат бўлган.

Қайта ишлаб чиқариладиган Samsung девайси Ҳиндистон, Вьетнам каби ривожланаётган мамлакатлар бозорларида сотилади. Жанубий Корея смартфон бозорида эса унинг янги Galaxy Note 8 тақдимотига қадар сотилиши айтилмоқда.

ZDNet тадқиқотлар маркази таҳлилчиларининг фикрича, бу Samsung томонидан амалга оширилаётган жиддий таваккалчилик бўлиб, агар смартфон яна ёниб кетишда давом этса, компания бунинг учун давлатга катта миқдорда жарима тўлашига тўғри келади. Ёниш ҳолатлари жаҳон миқёсида оммалашгач, компания бозорга чиқарилган 2,5 миллион дона смартфонларни қайта чақириб олиниши бўйича эълон берган эди.
Корея Республикаси ҳукумати қарори асосида Galaxy Note 7 гаджетининг қайта йиғиб олинган ва бозорга чиқишга улгурмаган қисми омборларда сақланмоқда ва улар қонуний равишда йўқ қилиниши лозим эди.

Олиб борилган тадқиқотларда мобиль алоқа воситасининг ёниб кетиши сабаблари Galaxy Note 7 смартфонининг аккумулятори билан боғлиқлиги, гаджетнинг ўзи хавфсиз экани аниқланган.

Galaxy Note 7 савдоси 2016 йилнинг август ойида бошланган эди. Смартфоннинг ёниб кетиши кўп кузатилгач, бир қатор мамлакат ва муассасаларда ундан фойдаланиш қонуний равишда таъқиқлаб қўйилган. Жумладан, Ўзбекистон Ҳаво йўллари Миллий авиакомпанияси ҳам компания самолётларига Galaxy Note 7’ни олиб чиқишни таъқиқлаш бўйича қарор қабул қилган.

Сайтимизнинг энг чиройли расмларини Инстаграмдаги саҳифамизда томоша қилинг!