Samsung One UI 6 янгиланишини янада тезроқ етказиб беради

Samsung One UI 6 янгиланишини янада тезроқ етказиб беради

Ўтган йилги One UI 4 билан солиштирганда, One UI 5 янгиланиши жуда қисқа вақт ичида ёхуд Google ўзининг Android 13 янгиланиши барқарор версиясини август ойида чиқарган бўлса, Samsung унга асосланган One UI версиясини атиги икки ойда ишлаб чиқди. Уни тарқатиш ҳам ўтган йилга қараганда сезиларли даражада тез амалга оширилмоқда. Масалан, Galaxy S22 серияси октабр ойидаёқ дунё бўйлаб One UI 5'га янгиланиб бўлган бўлса, ноябрда яна кўплаб Galaxy флагманлари ва ўрта синф смартфонлари, ҳатто, ўтган йилги Galaxy А52 ҳам янгиланишни қабул қилиб улгурди.

Эндиликда компания ўз ватанида Android 13'га асосланган янгиланишни Galaxy Z Fold 4 ва Flip 4 учун тарқатишни бошланганини эълон қилди ва шу билан бирга, аввалги Galaxy Z Fold ва Flip 3/2 букламафонлари ҳам йил охиригача янгиланишини маълум қилди.

Букламафонлардан ташқари компания ўзининг Galaxy S сериясидаги смартфонлари учун ҳам One UI 5 янгиланишини тарқатиш қамровини кенгайтирилганлигини ҳам айтиб ўтди. Galaxy S22 серияси ўтган ойда, Galaxy S21 серияси эса ноябр бошида янгиланиб улгурган бўлса, навбат Galaxy S20 ва Note 20 сериясига келган ва улар жорий ой охиригача янгиланади.

Samsung Galaxy Tab планшетлари ҳам қатордан қолган эмас: Galaxy Tab 8, кейин эса ўтган йили чиқарилган Tab 7 FE, сўнгра 2020 йилда чиқарилган Tab 7 ва Tab 6 Lite планшетлари кейинги йилгача One UI 5 билан янгиланади.

Шунингдек, компания Galaxy А серияси учун ҳам янгиланиш юборилиши ҳақида умумий маълумот бериб ўтди. Маълум бўлишича, бу йилги Galaxy А53 ва А33 ўтган йилги Galaxy А52s, А52 ва А32 билан бирга йил охиригича янгиланишни қабул қилади.

Айтиш керакки, ушбу янгиланиш жадвали Жанубий Корея учун бўлиб, юқорида келтирилган қурилмаларнинг деярли барчаси аллақачон Европа мамлакатларида One UI 5 янгиланишини қабул қилиб бўлган. Қолган ҳудудлар, хусусан, Ўзбекистондаги ушбу Galaxy смартфон эгалари ҳам катта эҳтимол билан йил охиригача янгиланишни олишлари мумкин бўлади.

Сўз охирида Samsung компанияси Google билан ҳамкорликни янада мустаҳкамлаган ҳолда ўзининг Galaxy'лари учун Android 14 ёхуд One UI 6 янгиланишини бу йилгидан ҳам тезроқ етказиб беришни ваъда қилди.

ЎҚИНГ: Қайси смартфон брендларининг қайси смартфонлари Snapdragon 8 Gen 2 билан чиқарилади?