Samsung ўзининг Ultra флагманларида олинган Ой суратларини сохталаштиришда айбланди!
Сўнгги йилларда чиқарилган Samsung Galaxy Ultra линиясидаги смартфонлар ўзининг Space Zoom қобиляти орқали Ойнинг ўта аниқликдаги суратларини олиши билан Интернетда катта машҳурликка эришди. Эсингизда бўлса бу ҳатто миллиардер Илон Маскни ҳам ҳайратда қолдирган эди. Бироқ, бир неча кун аввал Reddit ижтимоий тармоғи фойдаланувчиси Жанубий Корея компанияси флагманлари шунчаки Ой суратларини сохталаштиришини иддао қилди (The Verge орқали).
"ibreakphotos" тахаллусли Reddit фойдаланувчиси Интернетдан Ой суратини юклаб олади. Кейин эса уни 170×170 ўлчамга кичрайтиради ва уни хиралаштиради. Бунда Ойнинг деталлари деярли кўринмайди. Сўнгра кичрайтирилган хира Ой суратини ўз компютери мониторида, тўлиқ экранда очади ва хонадаги барча чироқларини ўчириб, Galaxy S23 Ultra билан хонанинг бошқа бурчагидан монитордаги Ой суратига камерани яқинлаштиради ва суратга олади. Натижа эса ажойиб. Samsung флагмани сохта Ой суратини ҳақиқий деб ўйлаган ҳолда уни ақлбовар қилмас даражадаги аниқликда суратга олди.
Reddit фойдаланувчиси айтмоқчи бўлган гап шундаки, Samsung Ой суратларини яратишда ҳеч қандай тасвирни қайта ишлаш ёки бошқа технологиялардан фойдаланмайди ва бу камера функцияси эмас, балки олдиндан тайёрланган сунъий интеллектдир. У юзлаб Ой суратларида "чиниқтирилган", яъни унда аллақачон Ойнинг барча томондан олинган текстуралари мавжуд. Сиз Ойни суратга олганингизда эса сунъий интеллект Ойни қандай турганлиги ҳолатини аниқлайди ва катта эҳтимол билан кратерлар жойлашувига қараб тайёр Ой текстурасини тасвир устига қўяди.
Таъкидлаш жоизки, бу Samsung биринчи марта Ой суратини сохталаштиришда айбланиши эмас. Компания 2020 йилда ўзининг S20 Ultra смартфонини 100х зум қобиляти билан тақдим қилганидан бери Ой суратлари бўйича саволларга тутиб келинади. 2021 йилда InputMag нашри ҳам S21 билан олинган Ой суратлари фейк эканлиги бўйича узун мақола чоп этган эди (Reddit фойдаланувчисининг бу ҳақдаги тушунтириши осонлиги ушбу муҳокамага янада кўпчиликнинг эътиборини тортган). Шундан сўнг Samsung ўзининг корейс тилидаги веб-сайтида юқори сифатли Ой суратларини қандай яратилишини тушунтириб берадиган блог постни жойлаган. Бу сафарги Reddit фойдаланувчиси иддаосидан кейин эса Samsung ушбу постнинг инглиз тилидаги вариантини ўзининг глобал веб-сайтига ҳам жойлаштирди.
Компаниянинг таъкидлашича, унинг смартфонлари обектларни таниб олиш учун Scene Optimizer функциясидан фойдаланади ва бу Galaxy S21 сериясидан бошлаб Ой учун ҳам қўлланилади. Ушбу Scene Optimizer хусусияти Ойни таниб олиш учун тўлин Ой ҳолатидан ярим Ой ҳолатигача бўлган Ойнинг Ердан туриб олинган суратларига асосланган сунъий интеллектга эга.
Қурилма Ойни аниқлаганидан сўнг, у Ойни аниқроқ кўрсатиш учун ёруғликни бошқаради. Қолаверса, тебранишларсиз, барқарор ҳолатдаги тасвирлар олиш учун Samsung ўзининг Zoom Lock функциясидан фойдаланади.
Ойни аниқ суратга олиш учун эса Galaxy камералари 25х ёки ундан юқори масштабда олинган 10 дан ортиқ тасвирни синтез қилиш учун Super Resolution – кўп рамкали композиция орқали тасвирларни яратишга ёрдам берадиган технологияни қўллайди.
Ва Ой суратлари мана шундай тарзда пайдо бўлади. Эҳтимол Samsung Ой суратларини сохталаштиришига ишонадиганлар учун бу етарли далил бўлмаслиги мумкин, лекин компания ўзининг флагманлари Ой суратларини юқорида айтилганидек – бир неча босқичли дастурий ишлов беришлар орқали яратишини айтади, ҳеч қандай тайёр текстуралар билан эмас. Хулоса эса ўзингиздан.
