Samsung қайта тикланган Galaxy Note 7 смартфонларини сотувга чиқариши мумкин

Samsung компаниясининг 2016 йил август ойида глобал тақдимоти ўтказилган Galaxy Note 7 фаблети сотувга чиқарилганидан кейин батареяда аниқланган муаммо сабабли қайтариб олинган эди. Масала янада жиддий тус олгач, 11 октябрда фирма ушбу моделни ишлаб чиқаришни расман тўхтатган эди.

Куни кеча Sammobile сайтида пайдо бўлган хабарга кўра, Samsung 2017 йилда қайта тикланган Galaxy Note 7 смартфонларини сотувга чиқариши мумкин. Ҳозирча технологик гигант бу борада якуний қарорга келмаган. Бироқ нашрнинг ёзишича, агар фирма ушбу моделдаги тикланган смартфонларни бозорга чиқаришни режалаштирса, улар биринчи навбатда, Ҳиндистон ва Вьетнам каби ривожланаётган мамлакатларда сотилади.

Ҳозирча Samsung қанча миқдордаги смартфонлар тикланишига аниқлик киритмаган. Компания ҳали-ҳануз аввалроқ сотилган носоз Galaxy Note 7 смартфонларини фойдаланувчилардан қайтариш жараёнини охирига етказгани йўқ.