Samsung расман Galaxy Z Fold4 букламафонини тақдим қилди

Samsung расман Galaxy Z Fold4 букламафонини тақдим қилди

Бир неча ойлик маълумотлар сиздирилиши ва миш-мишлардан кейин, Samsung ваниҳоят ўзининг Galaxy Z Fold4 букланадиган смартфонини тақдим қилди. Гарчи унчалик катта дизайн ўзгаришига эга бўлмаса ҳам янги авлод букламафони бир қанча яхшиланишларга эга.

Энг аввало қурилманинг ташқи кўринишидаги ўзгаришлардан бошлайдиган бўлсак, Galaxy Z Fold4 олдингиларига жуда ўхшаш, 6.2 дюймли ташқи, 7.6 дюймли ички экран, лекин энди унинг ташқи экрани "найнов" эмас. У 23.1:9 нисбатда бўлиб, тушунарлироқ қилиб айтганда энди унинг бўйи бироз пастроқ, эни эса бирозгина кенгроқдир, худди оддий смартфонлардек. Ички дисплейи ҳам шунга яраша ўзгарган, 21.6:18 нисбат, энига кенгроқ, бўйига эса пастроқ экран билан маза қилиб видеолар томоша қилиш ёки ўйинлар ўйнаш мумкин. Қурилманинг букланадиган жойи, яъни ошиқ-мошиқлари ва рамкаси ҳам нозикроқ қилинган бўлиб, унинг оғирлиги 263 граммни ташкил қилади (таққослаш учун Galaxy Z Fold3 - 273 грамм). 

Galaxy Z Fold4 камера борасида сезиларли яхшиланишга эга. Учлик камеранинг асосийси 50MP (ф/1.8) бўлса, қолганлари 12MP ултра-кенг ва 10MP телефото камералардир. Ташқи экранга 10MP селфи камера ўрнатилган. Ички экрандаги 4MP селфи камерани бир қарашда пайқамаслигингиз мумкин, чунки у экран остида жойлашган, лекин эътибор билан қарасангиз, у шу ерда. 

Тўртинчи авлод Z Fold капот остида, албатта, Qualcomm'нинг Snapdragon 8+ Gen 1 чипсетига эга. Шунингдек, қурилма 12GB оператив хотира ва 256GB дан 1TB гача бўлган доимий хотира билан таъминланган. Унинг 4,400 мА/с батареяси, 25 Вт симли, 15 Вт симсиз тезликда зарядланади. Гарчи бу хусусиятлар ўтган йилгидек бўлса ҳам, янги чипсет билан қурилма қуввати энди узоқроққа етади. 

Таъкидлаш жоизки букламафон IPХ8 сувга чидамлилик рейтинггига эга ва у Android 12L (One UI 4.1.1) билан етказиб бериладиган илк букланадиган смартфон бўлади. Бундан ташқари, қурилма S Pen билан ишлашни ҳам қўллаб-қувватлайди.

Galaxy Z Fold4 учун ҳозироқ олдиндан буюртма беришингиз мумкин. Нархига келадиган бўлсак, у ўтган йилгидек, ўзгармаган, 1.799 доллардан бошланади. Сотувлар 26 августдан бошланади.

ЎҚИНГ: Оммабоп смартфонлар топ ўнталиги (31 ҳафта)

 
 
 
 
Terabayt.uz сайтининг видеолари: Youtube'даги каналимизда!