Samsung янги дизайндаги смартфон ишлаб чиқаради
Кўплаб ишлаб чиқарувчилар смартфонларини максимал равишда тўлиқ экранли, дисплей юқори қисмини ҳар хил тирқиш, “қирқим” ва кемтикларсиз қилишга ҳаракат қилишмоқда. Бунга эришиш учун компаниялар турли конструкцияларни синаб, кўплаб экспериментлар қилиб келишмоқда.
Айрим ишлаб чиқарувчилар асосий камерани селфи камера сифатида ҳам ишлатиш мақсадида, орқа панелга қўшимча дисплей ўрнатишга қарор қилишган. Мисол учун, Vivo NEX Dual Display ва Nubia X шундай моделлар қаторига киради.
Энди эса, айланувчи камерали, экспериментал Samsung Galaxy A80’дан сўнг, компания Galaxy A линейкаси доирасида иккита дисплейли смартфонни ишлаб чиқармоқчи. Жанубий Кореялик техногигант икки экранли смартфон дизайнини патентлади.
ЎҚИНГ: Иккита экран нимаси!? LG учта сенсор экранли буклама смартфон патентлади!
Samsung Galaxy’нинг орқа панелдаги қўшимча дисплейли смартфони учун патенти Бутунжаҳон интеллектуал мулк ташкилоти (WIPO) томонидан эълон қилинган.
Патентга илова қилинган суратдан кўриш мумкинки, телефон олд панели тўлалигича дисплейдан иборат. Шунингдек, олд камера мавжуд эмас. Орқа тарафда эса қўшимча дисплей ўрнатилган бўлиб, у олд панелдагисидан кўра деярли икки карра кичикроқ. Ўлчамига қараганда ушбу дисплей асосан селфилар олишга мўлжалланган. Бармоқ излари ва доғлар қолмаслиги учун дисплей орқа панелнинг юқори қисмига жойлаштирилган.
Қолаверса, патентдаги маълумотлардан кўриш мумкинки, қайсидир дисплейдан фойдаланилмаётган вақтда, смартфон қувватини тежаш учун ўчириб қўйиш мумкин. Керак бўлиб қолган вақтда эса яна қайта ёқиб, ишлатиш мумкин.
Samsung яқинда янгиланган Galaxy A серияси устида кўплаб экспериментлар қилиб кўрди ва катта эҳтимол билан, иккита дисплейли смартфон шу линейка доирасида ишлаб чиқарилиши мумкин.
ЎҚИНГ: Иккита экранли, битта қувватда 30 кунгача ишлай оладиган «ақлли» соат яратилди!
