Samsung янги «ўлдириб бўлмас» смартфон тақдим этди
Жанубий кореялик техногигант Consumer Electronic Show 2020 (CES 2020) кўргазмасида ўзининг кучли ҳимояли янги смартфони анонсини берди. Samsung Galaxy Xcover Pro номли ушбу гаджет экстремал шароитларда узоқ муддатли ишлатишга мўлжалланган.
ЎҚИНГ: Биринчи «ўлдириб бўлмас» 5G-смартфон энг кучли процессорга ҳам эга!
Кучли муҳофазаланган бошқа смартфонлар каби, Samsung Galaxy Xcover Pro модели ҳам АҚШнинг MIL-STD-810G ҳарбий стандартига мос келади. Яъни у зарбага чидамли, қаттиқ юзага тушиб кетишидан чўчимаса ҳам бўлади. Бундан ташқари, мазкур қурилма IP68 стандартига кўра сув ва чангдан ҳам ҳимояланган.
Samsung Galaxy Xcover Pro диагоналига 6,3 дюймлик Infinity-O экран билан жиҳозланган. Дисплейининг тасвир аниқлиги 2400х1080 пикселлик, томонлари ўзаро 20:9 нисбатда.
Экраннинг юқори чап бурчагидаги тирқишда 13 мегапикселлик селфи-камера ўрнатилган. Смартфоннинг бош камераси эса қўшалоқ – 25 ва 8 мегапикселлик сенсорларни ўз ичига олган.
ЎҚИНГ: Samsung тан олди: унинг БАРЧА смартфон ва планшетларида жосуслик дастури бор экан!
«Ўлдириб бўлмас» телефон Samsung’нинг ўз ишланмаси – Exynos 9611 процессори базасига қурилган. Компания уни 4 ГБ тезкор ҳамда 64 ГБ ички хотира билан таъминлаган. Ҳозирги аксарият смартфонлардан фарқли равишда, унда корпусдан олинадиган, ток сиғими 4050 мА/соатлик аккумулятор қўлланган.
Galaxy Xcover Pro ҳозирча энг сўнгги эмас, балки Android 9.0 Pie талқинидаги операцион тизими асосидаги One UI график қобиғи бошқаруви остида ишлайди. Бироқ Samsung уни савдога чиққач, Android 10 талқинига янгилашга ваъда бермоқда.
Samsung бу маҳсулотини 31 январдан сотувга чиқаради ва унга 499 доллар нарх қўйган. Galaxy Xcover Pro дастлаб Финляндия, февралдан эса бошқа Европа мамлакатлар бозорларида пайдо бўлади.
