Samsung'дан электромобил кутманг!
Бугунги кунда электромобиллар саноати жадал ривожланмоқда ва дунёдаги айрим гигант авто-компаниялар ўзларининг электромобилларини чиқаришни режалаштираётганликлари сир эмас. Ҳатто автомобил ишлаб чиқаришга алоқаси бўлмаган Apple ва Xiaomi каби компаниялар ҳам ушбу саноатга ўз қизиқишларини билдираётгани ҳақида миш-мишлар тарқалган эди. Улар қаторида Жанубий Кореянинг Samsung компанияси бор. Нега бўлмасин? Ахир компаниянинг турли бўлимлари аллақачон етакчи электромобил ишлаб чиқарувчи компанияларни керакли компонентлар билан таъминлайди ва шундай экан, у учун электромобиллар саноатига кириш муаммо бўлмайди. Бироқ, сўнгги янгиликларга қараганда Samsung ўз бренди остида электромобиллар ишлаб чиқармайди.
The Korea Times нашрининг Samsung компаниясини икки юқори мартабали раҳбарлари берган маълумотларга асосланиб хабар беришича, компания қуйидаги икки сабабларга кўра ўзининг электрокаларини чиқармайди.
Биринчи сабаб шундаки, компаниянинг ушбу сегментга кириши унга барқарор даромад келтирмайди. Иккинчиси эса, ҳозирда электромобиллар ишлаб чиқарувчи етакчи компаниялар учун компонентлар ишлаб чиқарувчиси сифатида, Samsung ўз мижозлари билан рақобатчи бўлиб қолишни истамайди.
"Электромобиллар бизнесида Samsung'да дизайнга асосланган ҳали қилиниши керак бўлган ҳали кўплаб ишлар бор. Бу компанияга қимматга тушиши ва кафолатланмаган қийматга эга бўлиши мумкин" дейди раҳбарлардан бири.
Смартфон ишлаб чиқаришда Samsung етарличи кучли рақобатчиларга эга ва бу компаниянинг даромади тушишига олиб келади. Шунинг учун ҳам компания кўпроқ фойда олиш учун компания ўзининг компонентлар билан таъминлаш бизнесига кўпроқ ишонади.
Таъкидлаш жоизки, ҳозирда Самсунг автоном ҳайдаш чиплари, камера модуллари, батареялар ва OLED дисплейлари каби қисмлар билан Tesla, Hyundai, BMW, Audi, Rivian ва бошқа бир нечта компанияларни таъминлайди. Шундай қилиб, агар Samsung электромобиллар ишлаб чиқариш бизнесига қадам қўйса, у юқорида санаб ўтилган ўз мижозлари билан рақобат қилишига тўғри келади ва компания Apple'га нисбатан қарийб ўн йил давом этган патент бузилиши бўйича даъвосига ўхшаш вазиятга тушиб қолишни истамайди.
"Ҳар доим розиликка қаратилган бошқарув ҳақида хабардор бўлиш, Samsung ўзининг Apple билан курашидан олган муҳим бир сабоқлардан биридир" дейди раҳбарларнинг яна бири.
Шундай экан, Samsung'дан Galaxy Car Ultra электромобилини S Pen билан чиқаришини кутиб овора бўлманг.
