Samsung'нинг энг инновацион ва қиммат смартфони Android 10'га кутилганидан анча олдин ўтади
Samsung Galaxy Fold букламафони фойдаланувчилари «келажак парчаси» учун катта пул тўладилар, аммо янги дастурий таъминот янгиланишини кутишга мажбур бўлдилар. Samsung компаниясининг аввал эълон қилинган режаларига кўра, смартфоннинг операцион тизими апрель ёки май ойида янгиланиши керак.
Бироқ хабар берилишича, кутиш унчалик узоққа чўзилмаслиги мумкин. Тафсилотлар билан машҳур XDA Developers сайти бош муҳаррири Макс Вайнбах Twitter ижтимоий тармоғидаги саҳифасида бу ҳақида ўртоқлашди.
Унга кўра, Samsung Galaxy Fold Android 10'ни февраль ёки март ойларида қабул қилиши эҳтимоли йўқ эмас. Шу билан бирга, у феврални янгиланиш эҳтимоли юқорироқ вақт деб ҳисоблайди.
Ҳозиргача Samsung Galaxy S9, Galaxy Note10, Galaxy S10 ва Galaxy Note9 смартфонларига мўлжалланган Android 10 асосидаги OneUI 2.0 қобиғини чиқарган.
