Сайёрамизнинг энг бой одами 2019 йилги ушбу бешта китобни тавсия этди
Янги йил байрами арафасида сайёрамизнинг энг бой инсони, Microsoft корпорацияси асосчиси Билл Гейтс, одатдагидек, ўз нуқтаи назари бўйича ўтаётган йилдаги энг яхши китоблар номларини эълон қилди. Бу ҳақда Forbes маълумотига таяниб «Халқ сўзи» нашри хабар берди.
ЎҚИНГ: Пентагон билан шартнома тузиб, Билл Гейтс яна дунёнинг энг бой кишисига айланди!
Бизнесмен ўқиб чиққан китоблари ичида Таяри Жонснинг қора танли жуфтлик ҳақида ҳикоя қилинадиган «Америкача никоҳ» романини энг яхшиси, дея эътироф этди.
– Бу тарих мавзунинг оғирлигига қарамасдан, сизни ўзига «ютиб» юборади, – дея ишонтиради Гейтс.
Унинг рўйхатидан яна Жилл Лепорнинг АҚШ тарихига оид «Бу ҳақиқатлар», Вацлав Смитнинг Ер курраси келажаги ҳақида сўз юритилган «Ўсиш» ва Диана Тавеннернинг «Тайёр» асарлари жой олган. Эътиборлиси, «Тайёр» китоби фарзандларини бахтли қилишга ўргатиш йўлида ташвишланиб юрган ота-оналар учун қўлланмадир.
Гейтс яна Мэтью Уокернинг «Нима учун биз ухлаймиз?» асарини ажратиб кўрсатган. У бу ҳақида гапира туриб, илгари ухлашдан қочгани, сабаби буни ялқовлик белгиси деб ҳисоблаб юрганини эслайди. Ишбилармон китоб уни ушбу одатини қайта кўриб чиқиб, ўзгартиришга мажбур қилганини билдирган.
Маълумот учун, яқиндагина Microsoft корпорацияси Пентагон билан шартнома тузишга эришгач, Билл Гейтснинг бойлиги 110 миллиард долларга етган. Шартнома учун ҳаракат қилаётган Amazon бўш қўл билан қолиб, унинг акциялари деярли 2 фоизга арзонлашган, раҳбари Жефф Безос сармояси эса 108,7 миллиард долларгача камайган.
ЎҚИНГ: Дунёнинг энг бой одами компанияси банкрот бўлишини башорат қилди
