Sharp Aquos R2 Compact – экрани иккита «кемтик»ли илк смартфон! (+видео)
Япониянинг Sharp компанияси ўз смартфонларининг ўзгача, бироз ғалатироқ дизайни билан танилган. Масалан, унинг яқинда намойиш этилган Aquos Zero флагмани дисплейининг тепасида ўта кенг «ўйиқ» мавжуд.
ЎҚИНГ: Apple, LG ва Sharp биргалашиб, Samsung’нинг «оёғига болта уришмоқчи»!
Компаниянинг янги ихчам флагмани – Aquos R2 Compact эса экранининг тепа қисмидан ташқари, пастида ҳам яна битта «кемтик»ка эга!
Sharp Aquos R2 Compact диагоналига 5.2 дюймлик IGZO-дисплей билан жиҳозланган бўлиб, унинг тасвир аниқлиги 2280x1080 пикселга тенг. Компания дисплейдаги сенсор қопламининг янгиланиш тезлигини икки карра оширган – у худди iPhone XR сингари 120 Гц частотага эга.
Экраннинг юқорисидаги «кемтик» олд камера учун, пасткиси эса – бармоқ изи сканери учун «ўйилган». Sharp дактилоскопик датчикни корпуснинг ён қиррасига ёки орқа панелига нега ўрнатмаган – ғалати. Дарвоқе, смартфон корпусининг ўлчамлари 131x64x9.3 миллиметрга, вазни эса 135 граммга тенг.
ЎҚИНГ: Sharp Aquos S2: япон технологияси ўртача нархда
Бошқа жиҳатларига кўра мазкур қурилма «катта» флагманлардан умуман қолишмайди. Унинг ишлаш самарадорлиги учун илғор Snapdragon 845 чипсети ҳамда 4 гигабайтлик тезкор хотира масъул. Aquos R2 Compact доимий хотираси 64 гигабайтлик, унга яна microSD форматли хотира картасини ҳам ўрнатиш мумкин. Смартфон Android операцион тизимининг энг сўнгги – 9 Pie талқини бошқаруви остида ишлайди.
Sharp ушбу ихчам флагманида яна битта ўзгачаликка қўл урган – смартфонсозлар ўзларининг илғор (ва ҳатто ўртача) моделларини қўшалоқ камера билан таъминлаётган бир пайтда, Aquos R2 Compact камералари якка датчикли. Аниқлиги 22.6 мегапикселга тенг бўлган ушбу камера тасвирни оптик барқарорлаштириш тизимига эга бўлишдан ташқари, суратга олинаётган саҳналарни «таниб олиш» учун «сунъий онг»дан ҳам фойдаланади. Селфи-камера эса 8 мегапикселлик.
Мазкур ихчам смартфоннинг 2500 мА/соатлик аккумулятори USB Type-C порти орқали тезкор қувват ола билади. Унда симсиз интерфейслардан Wi-Fi 5 ГГц, Bluetooth 5.0, NFC модуллари, қулоқчин учун 3.5 миллиметрлик тирқиш мавжуд.
Мана, қуйида Sharp Aquos R2 Compact смартфонига бағишлаб тайёрланган видеороликни томоша қиламиз:
Sharp Aquos R2 Compact нархи борасида ҳозирча бирор маълумот йўқ. Бу гаджет маҳаллий SoftBank алоқа оператори тармоғида 2019 йил январь ойи ўрталарида сотувга чиқарилади. Баҳорда стандарт версиядаги Sharp Aquos R2 модели Японияда сотувга чиқади, аммо у ҳам хорижий бозорга тақдим этилмаса керак.
ЎҚИНГ: Омад чопмади: Sharp Хитой смартфонлар бозорини тарк этмоқчи
