Шахмат роботи ўйин вақтида етти ёшли рақибининг бармоғини синдирди

Шахмат роботи ўйин вақтида етти ёшли рақибининг бармоғини синдирди

Ўтган ҳафтада якунига етган Moscow Chess Open турнирида, шахмат ўйнайдиган робот рақиблар билан мусобақалашиш учун "ишга олинган" эди. Шахмат доналарини силжитиш учун мослаштирилган ва бир вақтнинг ўзида бир неча киши билан ўйнай оладиган "робот қўл" турнирнинг сўнгги кунида Москвадаги тўққиз ёшгача бўлганлар тоифасидаги энг яхши 30 шахматчиларнинг бири бўлган, Кристофер исмли етти ёшли боланинг бармоғини ростакамига синдирди. Бу ҳақида маҳаллий ахборот воситаларига таяниб The Guardian нашри хабар бермоқда.

Маълум бўлишича, воқеага боланинг шошқалоқлик қилгани сабаб бўлган. Робот фақат шахмат доналарини суриш учун дастурланган бўлиб, унда одам ҳаракатларини аниқлайдиган хусусият бўлмаган.

Россия шахмат федерацияси вице-президенти Сергей Смагиннинг таъкидлашича, Кристофер хавфсизлик қоидасини бузган, ёхуд робот юриш қилганида, бола уни кутиб турмаган. Шунингдек, у бу тасодиф эканлигини ва робот мутлақо хавфсиз эканлигини айтган.

"Робот боланинг бармоғини синдирди. Албатта, бу ёмон." дейди Сергей Лазарев, Москва шахмат федерацияси президенти. Унинг қўшимча қилишича, робот бундан олдин бир неча ўйинларни кўнгилсизликларсиз ўйнаган. Лазарев сўзларига кўра, Кристофер эртаси куниёқ ўйинга қайтган ва турнирни якунлаган.

ЎҚИНГ: Apple Bionic A16 қанчалик кучли чипсет?