«Симларни кесиб ташланг!» – 16 мартда Xiaomi қанақа янги гаджет тақдим этяпти?

  •   DiMaX
  •  1675
  •  14.03.2020 11:10

«Симларни кесиб ташланг!» – 16 мартда Xiaomi қанақа янги гаджет тақдим этяпти?

Куни кеча Xiaomi корпорацияси ўзининг Redmi Note 9 Pro Max смартфонини тақдим этган эди. Бундан ташқари, компания унинг янада арзон версияси – Redmi Note 9 Pro моделини ҳам намойиш қилган.

ЎҚИНГ: Samsung ҳам Redmi Note 9 Pro Max нархида «автономлик монстри»ни сотувга чиқарди

Тиниб-тинчимаган бу компания келаётган душанба – 16 март куниёқ яна битта девайсининг тақдимотини ўтказмоқчи. Бу хусусда корпорация вице-президенти ҳамда Xiaomi India раҳбари Ману Кумар Жейн (Manu Kumar Jain) ўзининг Twitter-аккаунти орқали эълон қилган.

Қизиғи шундаки, мазкур тизерда компания ўз мухлисларига «Кабелларни кесиб ташланг!» дея хитоб қилмоқда:

Ману Кумар Жейн бу твитида шундай деяпти:

«Xiaomi ихлосмандлари, симлардан воз кечиш (уларни қирқиб ташлаш) ҳамда ўз турмушингизни осонлаштириш вақти келди. Xiaomi’нинг ажойиб янги маҳсулоти 16 мартда намойиш этилади. Мен ақл бовар қилмас даражада ҳаяжондаман. Тахминлар борми?»

Тизердаги қисқа лавҳа марказида акс этган белгига кўра, компаниянинг янги девайси – симсиз қувватлаш станцияси бўлиши эҳтимоли энг юқори. Лекин шуниси ҳам борки, жуда кам сонли Xiaomi смартфонлари симсиз қувватлаш технологиясига эга; вице-президент эса компаниянинг барча маҳсулотлари ишқибозларига мурожаат этган. Шу боис, яна бир тахминга кўра, 16 март куни «хитойча Apple» янги симсиз қулоқчин намойиш этса ҳам ажабмас.

ЎҚИНГ: MIUI 12 ҳамда Android 11’гача янгиланувчи Xiaomi смартфонлари иккита рўйхатда!

Terabayt.uz сайтининг видеолари: Youtube'даги каналимизда!