Смартфон бозори: нафақат Huawei, балки яна бир хитойлик компания Apple’дан ўзиб кетди!
Gartner таҳлил компанияси жорий йилнинг биринчи чорагидаги смартфонлар савдоси бўйича статистикани эълон қилди. Унда бир нечта қизиқ фактларга кўзимиз тушади.
ЎҚИНГ: Terashop.uz’даги энг харидоргир 10 смартфон
Аввало, энг муҳим бозорларда умумий савдо кўрсаткичлари пасайган. Қолаверса, Huawei смартфон сотиш бўйича Apple’ни қувиб ўтиб, иккинчи ўринга чиқиб олган. Булардан ташқари, етакчиликка даъвогарлар сафига яна бир нечта бренд қўшилган.
Хитойда смартфон савдоси 3,2 фоизга пасайган бўлса, АҚШда бу кўрсаткич анча йирик – нақ 15,8%! Умумий ҳисобда бу йилнинг илк чорагида 373 миллионта смартфон сотилган. Бу эса ўтган йилнинг шу давридаги (383,5 миллионлик) кўрсаткичдан 2,7 фоизга кам.
Samsung айни дамда дунё бўйича смартфонлар бозорининг етакчиси бўлиб қолмоқда, аммо унинг савдо кўрсаткичлари ҳам 78,5 миллиондан 71,6 миллионгача пасайган. Иккинчи ўринга кўтарилиб олган Huawei эса бозорнинг 15,7 фоиз улушини эгаллаган. Биринчи чоракда у 58,4 миллионта смартфон сотган бўлиб, бу ўтган йилнинг мос даврига нисбатан 45 фоизга ўсиш, деганидир! Apple смартфонларининг савдоси бўлса 54 миллиондан 44,5 миллионгача пасайган. Купертиноликларнинг бу бозордаги улуши ўтган йилнинг шу даврида 14,1 фоизни ташкил этган бўлса, бу йил 11,9 фоизга тушиб қолган. Бир йил аввал смартфон сотиш ҳажми бўйича иккинчи ўринда бўлган Apple энди учинчи ўрин билан кифояланиб турибди.
Рейтингдаги кейинги иккита поғонани банд этган Oppo ҳамда Vivo компаниялари BBK холдинги таркибига киради. Уларнинг иккаласи биринчи чоракда сотган смартфонларни қўшсак, шу даврда Apple сота олган айфонлардан ҳам ошиқ натижани кўрамиз! Бу – ҳали ушбу холдинг таркибидаги яна иккита бренд – OnePlus ва Realme’ларни ҳисобга олмаган ҳолдаги вазият. Шу тариқа, ушбу омил Apple смартфон бозорида нафақат Huawei’дан, балки BBK’дан ҳам орқада, дейиш учун асос бўла олади.
Агарда хитойлик учта етакчи смартфонсоз – Huawei, Oppo ва Vivo биринчи чоракда сотган смартфонларни жамласак, 115,3 миллионтага етади. Бу эса мазкур саноат гигантлари бўлмиш Samsung ҳамда Apple сотган смартфонларнинг умумий (116,1 миллионта) миқдоридан озгина паст кўрсаткичдир. Бироқ кейинги пайтларда хитойлик смартфонсозларнинг савдо кўрсаткичлари ошиши тенденцияга айланганини инобатга олсак, иккинчи чоракда бозор қиёфаси ўзгариши мумкин.
Лекин охирги ҳафталар ичида бунга халақит берувчи жиддий омил ҳам юзага келган – АҚШ ҳукумати Huawei’га қарши жиддий юриш бошлаган. Шу боис хитойлик техногигантнинг смартфон савдоси ҳозирдан пасая бошлаган. Демак, воқеалар ривожини бирга кузатамиз.
ЎҚИНГ: Санкциялар ўз йўлига: Huawei ҳамёнбоп Nova 5i смартфонини тақдим этяпти!
