Смартфон катталигидаги виртуал воқелик шлеми ишлаб чиқилди
Шу вақтга қадар замонавий виртуал воқелик шлемлари деганда Oculus Rift, Samsung Gear VR, Microsoft Hololens ва бошқа қимматбаҳо бренд қурилмалари ёки картон қоғозидан тайёрланган арзон Google Cardboard тушунилар эди. Сан-францисколик стартапчилар эса чўнтакка осонгина жойлашадиган SmartVR виртуал воқелик шлеми лойиҳасини ишлаб чиқишди. Айни пайтда сифатли ва арзон шлемлар учун Indiegogo манбаси орқали инвесторлар жалб қилинмоқда.
Картон қоғозли виртуал воқеалик шлемларининг асосий иккита камчилиги бор: ишончсизлиги ва кучсиз оптикаси. Dodocase стартапи ишланмаси эса пластикдан ишлаб чиқилган. Илк бор синовдан ўтказганларнинг сўзларига қараганда, SmartVR`нинг оптик системаси Google Cardboard`га қараганда сезиларли даражада яхшиланган.
Маълумотларга қараганда, Google компанияси SmartVR`ни сертификатлаб, унинг бозорлардан ўрин олиш ҳуқуқини тасдиқлади. Қайд этиш жоизки, янги шлемнинг йиғилган ҳолатдаги ҳажми iPhone 5 катталигида бўлиб, уни олиб юриш жуда қулай.
SmartVR iOS ва Android асосида ишлайдиган ҳар қандай катталикдаги смартфон билан мослашади. Қурилма линзаларининг диаметри – 38 мм.
Стартапчилар илк виртуал воқелик шлемини 2016 йилнинг июнида тақдим этишга ваъда бермоқда. Ускуна нархи эса бор-йўғи 28 доллар туради.
