Смартфон оламидаги энг бозоргир моделлар эълон қилинди
Маркетинг ва савдо таҳлиллари билан шуғулланадиган компаниялар одатда муайян у ёки бу компаниянинг бозордаги ўрни хусусида ўрганишлар олиб борганида сотилган смартфонларнинг умумий миқдорига асосий эътиборни қаратади. Counterpoint маркетинг компанияси таҳлилчилари куни кеча октябр ойи ҳолатида жаҳонда яхши сотилган смартфонларнинг моделларини эълон қилдилар.
Унга кўра, iPhone 8 жаҳон смартфон бозорида энг яхши сотилаётган смартфон модели бўлиб чиқди. Унинг бир ой мобайнида смартфон бозорида сотилган гаджетлардаги улуши 4,6% ни ташкил қилмоқда. Ундан кейинги ўринни 4 фоиз улуш билан iPhone 8 Plus эгаллаган.
Samsung Galaxy Note 8 эса 2,4% улуш билан учинчи ўринга муносиб топилган. 4-ўрин Samsung Galaxy S8+ (1,5%) флагманига, бешинчи ўрин iPhone 6 (1,2%) га насиб қилган.
iPhone 7 (1,2%) "кучли олтилик"ка кирган бўлса, 8-ўринда Vivo X20 (1,2%) модели турибди. Саккизинчи ўринга Samsung Galaxy S8 (1,2%), тўққизинчи ўрин Xiaomi Redmi Note 4 (1,1%) муносиб кўрилган. Oppo R11 эса 1,1% улуш билан "энг яхши ўнталик"ни якунлаб берган.
Кўриниб турибдики, Apple маҳсулотларига қизиқиш бирмунча юқори бўлса, Samsung смартфонларига қизиқиш 2 баробар паст. Гап шундаки. сўнгги йилларда кореялик флагманларига қўйган нарх "Олма"никига тенглашган. Натижада, харидорлар Apple флагманларига диққат қилишмоқда. Ҳозирча компания iPhone X савдосига оид статистикани тақдим қилмаган.
Таҳлиллар фойдаланувчилар бу йилги Samsung Galaxy S8 флагманидан кўра, iPhone 6 ҳамда iPhone 7 флагманини маъқул кўришларини кўрсатмоқда. Бу эса Apple ҳануз харидорлар ўртасида нуфузини йўқотмаганидан далолат беради.
