Смартфон портлашидан қўли ва юзи майиб бўлган қизчанинг оиласи Samsung’дан 250 000 доллар талаб қилмоқда

Смартфонсозлик саноатидаги энг йирик можаро – жанубий кореялик компаниянинг Galaxy Note 7 фаблетларидаги портлаш бўлса керак. Бу машмаша ортидан Samsung катта зиён кўрган ва нуфузини анча йўқотган эди.

ЎҚИНГ: Портлаб кетувчи Galaxy Note 7 смартфонларининг 96 фоизи қайтариб олинди

Аммо ушбу корпорациянинг бошқа русумдаги смартфонларида ҳам шундай ҳолатлар кузатилмоқда. Жумладан, жаҳон жамоатчилигига куни кеча маълум бўлган – Хитойда юз берган нохуш воқеани олайлик. Хабарларга кўра, беш яшар қизчанинг қўлидаги Galaxy Note 4 фаблети портлаб, унинг кафти ва юзига шикаст етказган. Шифохонада маълум бўлишича, унда иккинчи даражали куйиш жароҳати қайд этилган.

Қизчанинг оиласи бунинг учун компенсация тарзида Samsung’дан нақ 250 минг АҚШ доллари миқдорида тўлов талаб қилмоқда. Компаниянинг Хитойдаги офиси эса бу хонадонга қизчанинг муолажалари учун атиги бир ярим минг доллар таклиф этаётир.

Қизчанинг отаси ушбу смартфонни 2016 йилнинг август ойида харид қилган, портлаш воқеаси эса ўтган йилнинг март ойида бўлиб ўтган экан. Аммо у кенг жамоатчиликка эндигина маълум бўлди. Мазкур масала бўйича иш судга оширилган, аммо у ҳалиям ниҳоясига етмаган. Суднинг навбатдаги эшитуви 21 августда бўлишини айтишмоқда.

ЎҚИНГ: Батареяларнинг портлаши: сабаб ва оқибатлари, ҳимояланиш усуллари