Смартфон саноатида кучли рақиб кутилмоқда

Смартфон саноатида кучли рақиб кутилмоқда

Nokia бренди HMD Global компаниясининг тинимсиз ҳаракатлари эвазига секин-аста ўз нуфузини қайта тикламоқда. Афсонавий бу номни қайта тиклаш учун компания 2 йўлдан бормоқда: ўтмиш хотираларини соғинганлар учун аввалги моделларни замонавий талаблар уйғунлигида ишлаб чиқариш ҳамда бугунги авлод учун мос ҳашамдор смартфонлар тайёрлаш.

Яқин фурсатларда намойиш қилинадиган Nokia 9 флагмани смартфон саноатидаги экспертларнинг ҳам диққатини тортиши кутилмоқда. У орқали Nokia бренди бугунги рақобатда ҳам янгилик ярата олишини исоботлаш тадоригини кўрмоқда.

Бугун бир қатор инсайдерлар томонидан Nokia 9 модели акс этган суратлар интернет тармоғида тарқатилди.

Суратда акс этган смартфонга кўра, компания ниҳоят тўлиқ экранли дизайнга ўтиб, рақибларга зарба бермоқчи. Орқа панелдаги уч объективли бош камера эса мақсаднинг жиддийлигидан далолат беради.

6,01 дюймли AMOLED-экранга эга бўладиган Nokia 9 ўзининг фасади билан Xiaomi Mi Mix моделини эслатаётган бўлса ажаб эмас. Шу билан бирга, компания смартфон иягидаги виртуал майдонни ҳам "ёпиш"нинг ўзига хос ечимини жорий қилган.

Смартфон орқа панелидан бир қарашда ўтмишдаги "кирпич" телефонларига ўхшаб кетади. Бироқ унинг корпус қалинлиги 7.3 миллиметрли бўлади. Nokia 9 олд панели 100% экрандан иборат. Юпқа рамкали мобил алоқа воситаси дисплей сканерига эга бўлади.

Янги гаджетнинг ўзига хослиги сифатида уч сенсорли бош камерани айтиш мумкин. Маълумотларга кўра, камера датчикларининг аниқлиги 41 Мп, 20 Мп ҳамда 9,7 Мп бўлади. Улар учун Zeiss брендининг оптик қисмларидан фойдаланилган.

Шубҳасизки, флагман кучли - 8 ядроли Qualcomm Snapdragon 845 процессорига эга бўлади. Унинг бугунги мобил технологиялар билан таъминланиши ҳам аниқ. Бироқ ҳозирча олд камера ҳамда суҳбат динамигининг қаерда жойлаштирилгани маълум эмас.