Смартфонингизни "Ҳеч нарса"га айлантиринг
Бир неча ойлик шов-шувлардан кейин Nothing ваниҳоят phone (1) ни тақдим қилди. Гарчи лондонлик компаниянинг илк смартфони техник хусусиятлар борасида ўрта даражали бўлса ҳам, у орқа томонда қурилма ички қисмларини кўрсатиб турадиган ажойиб, шаффоф дизайнга эга ва агар сиз ҳам ўз смартфонингизни ана шундай ноёб кўринишда бўлишини истасангиз, dbrand'да сиз учун "нимадир" бор.
Техно компанияларни ўзининг кинояли ва айёрона маркетинги билан мазах қиладиган dbrand'нинг бу сафарги нишони Nothing бўлди. Компания iPhone 13 Pro Max, Pixel 6 Pro ва Galaxy S22 Ultra учун phone (1) орқа панели дизайнидан очиқдан-очиқ кўчирилган (dbrand'нинг ўзи буни тан олади), қурилма ички қисмларига тақлид қиладиган "Something" махсус скин ва кейслар тўпламини чиқарди. Коллекция чекланган миқдорда бўлиб, скинлар нархи 24.95 долларни, ҳимоя кейслари нархи эса 49.90-54.90 долларни ташкил қилади. Шунингдек, хоҳловчилар бошқа қурилмалар учун ҳам буюртма беришлари мумкин.
"Смартфон бозорига ёриб киришни тасаввур қилинг. Маълум бўладики, Apple'дан кўра камроқ пулга эга бўлиш буни бироз қийинлаштиради. Бундан ташқари dbrand'даги ахмоқлар сенинг дизайнингни "тўтиқушлаб" (тўтиқуш каби такрорлаб), уни ўзингга қарши рақобатчи қилади. Кечирасан, Карл." дейди dbrand ўзининг Something тўплами саҳифасида.
Қўшимчасига, компания ҳеч нарсани ўғирламаганлигини, аксинча, Teardown ташаббуси билан бошқа брендларнинг мобил қурилмалари ички қисмларига қарашга кўп вақт сарфлаб, Nothing дизайнини креатив тарзда бошқа қурилмалар учун қайта чиқарганлигини таъкидлайди. Dbrand'га кўра, бу ўғирлик эмас - бу плагиат ва бу жиноят эмас (плагиат Америкада кўп ҳолларда ноқонуний эмас, лекин у муаллифлик ҳуқуқини, патентни ёки савдо белгисини бузадиган бўлса, қонуний чоралар кўрилиши мумкин).
ЎҚИШ: Xiaomi 12 Lite'нинг техник жиҳатлари ва қадоқ таркиби билан танишмиз
