Смартфонлар глаукома касаллигини текширишда ишлатилади

Смартфонлар глаукома касаллигини текширишда ишлатилади

Йилдан-йилга смартфонлар оддий алоқа воситасидан кўп функцияли гаджетга айланиб бормоқда. Мана, тахминан 3 йилдан бери смартфон ёрдамида юрак пульсини ўлчаш, сарфланган калорияларни аниқлаш мумкин. Бундай вазифаларнинг кўлами борган сари кенгайиб боряпти.

Кембридж университетининг олимлари эндиликда смартфонлардан глаукома каби кўз касалликларини текширишда фойдаланишни таклиф қилишмоқда. Бунинг учун олимлар махсус механизмни ҳам яратишган. Глаукомани текшириш учун смартфон ва VR-шлем каби махсус Viewi мосламаси зарур бўлади. Икки қурилма ўзаро боғлангач, смартфондаги иловада очиқ бурчакли глаукомани текширадиган индикаторлар ишга тушади. Натижада керакли синов маълумотлари тўпланади.

Ҳар бир кўзни текшириш учун тахминан 5 дақиқа вақт сарфланади. Натижалар эса осон тушуниладиган форматда кўрсатилади. Шунингдек, олинган натижаларни кўз шифокори билан ҳам улашиш мумкин. Ушбу лойиҳадан кўзланган мақсад шуки, кўзда содир бўлаётган касаллик ҳолатини текшириш учун ҳар сафар шифокор қабулига бориш шарт эмас, балки уй шароитида натижаларни смартфон ёрдамида олиб, уларни мутахассисга юбориш кифоя. Шу билан бирга, Кембридж олимлари бундай кашфиёт тиббиёт хизматлари яхши ривожланмаган мамлакатлардаги инсонларда кўз касалликларини аниқлаш ва даволашда катта самара беришини таъкидлашмоқда.

Ҳозирча касалликни текширишда қўлланиладиган Viewi шлемнинг нархи 20 еврога баҳоланган.

Сайтимизнинг энг чиройли расмларини Инстаграмдаги саҳифамизда томоша қилинг!