Snapchat камерали кўзойнакларни намойиш этди

Snapchat камерали кўзойнакларни намойиш этди

Машҳур Snapchat тармоғи ўзининг илк гаджетини намойиш қилди. Камералар билан жиҳозланган Spectacles кўзойнаклари кейинги ойда сотувга чиқарилиши кутилмоқда. Маълум қилинишича, кўзойнакларни 130 АҚШ доллари эвазига харид қилиш мумкин. Камерали кўзойнаклар бир хил ўлчамда ва 3 та рангда (қора, зангор, коралл) ишлаб чиқарилади.

Кўзойнак орқали видеони ёзиб олиш учун гаджетдаги тугмани босиш кифоя. Ҳозирча фақат Snapchat иловасида бўлганидек, кўзойнак камераларида 10 сонияли видеоларни ёзиб олиш мумкин. Шундан кейин симсиз алоқа орқали ролик фойдаланувчининг смартфонига узатилади ва уни машҳур тармоқда улашиш мумкин бўлади.

tqe4tyvk

Кўзойнакка 115 градусли объектив ўрнатилган бўлиб, у аксарият смартфонлар ва фотокамераларникига қараганда кенгроқ бурчакка эга. Snapchat бундай камералар одамнинг кўриш бурчагига анча яқинлигини айтмоқда. Ҳозирча бундай роликлар тармоқда қандай форматда намойиш этилиши номаълум. Бироқ видео кенгайган бурчакда ёзилганини ҳисобга олсак, илова ундаги фақат зарурий қисмларни кўрсатишини тахмин қилиш мумкин.

Интернет тармоғига жойланган видеода фойдаланувчи видеони томоша этиш вақтида унинг мўлжалини горизонталдан вертикалга ўзгартиришини кўриш мумкин. Мазкур кўзойнаклар ҳозирча чегараланган ададда ишлаб чиқарилади.

Snapchat тармоғида айни вақтда 150 миллиондан ортиқ одам фойдаланади, компаниянинг биржа фондидаги қиймати бир неча миллиард долларни ташкил этади. Шуларни ҳисобга олсак, мазкур кўзойнаклар анча харидоргир бўлишини иккиланмай айтиш мумкин.

Сайт янгиликларидан доимий хабардор бўлиш учун Телеграм каналимизга қўшилинг!