Snapdragon 865 чипида ишловчи, 50МП асосий камерали Oppo Reno5 Pro+ смартфони тақдим қилинди

Ой бошида Reno5 ва Reno5 Pro смартфонларини тақдим қилган Oppo компанияси мана энди Reno5 Pro+ моделини алоҳида маросим ўтказиб намойиш этди.

Қурилма 6.55 дюйм диагоналли AMOLED панелга эга бўлиб, экран резолюцияси 1080х2400 пикселни ташкил этади. Томонлари нисбати 20:9 бўлган дисплейнинг янгиланиш частотаси 90Hz га тенг. Сенсорнинг сезгирлик даражаси ҳам ўртачадан бироз юқори — 180Hz. Смартфон экранининг энг муҳим жиҳатларидан бири шуки, унинг максимал ёрқинлик даражаси 1,100 нитга етади.

Қурилма 8/128ГБ ёки 12/256ГБ ҳажмли UFS 3.1 хотираси ҳамда Snapdragon 865 чипсети билан жиҳозланган. microSD картаси қўллаб-қувватланмайди.

Камера жамланмаси ҳам смартфоннинг бошқа жиҳатларига мос. Sony'нинг янги 50МП IMX766 (1/1.56" ўлчамли) сенсори f/1.8 апертура ва тасвирни оптик барқарорлаштириш хусусиятларига эга. Телефото камераси 13МП резолюцияга эга, f/2.4 апертура билан жиҳозланган, бироқ зум ҳақида маълумот берилмаган.

Орқа панелдаги қолган икки камеранинг бири 16МП f/2.2 ультракенг камера бўлса, иккинчиси 2МП f/2.4 макро камерадир. Олд томонга 32МП f/2.4 селфи камера қўйилган.

Смартфон қуввати ҳақида қайғурмасангиз ҳам бўлади, сабаби Reno5 Pro+ га 4,500 мАс аккумулятор ўрнатилган. SuperVOOC 2.0 қувватлаш технологияси эса 65 Вт қувват етказиб беради. Симли тескари зарядлаш функцияси ҳам бор.

Эътиборга молик яна бир жиҳат Android 11 асосидаги ColorOS 11 қобиқ дастуридир. Смартфон корпуси премиум тоифада бўлиб, шиша ва алюминийдан ишланган. Қурилмага Dolby Atmos созламали стереодинамиклар, ранг спекти сенсори ва тезкор экраности бармоқ изи сканери ўрнатилган.

Ҳозирча, смартфон фақат Хитойда сотувга чиқади. Олдиндан буюртмалар 18 январдан, сотувлар эса 22 январдан бошланади. Қурилманинг 8/128ГБ базавий версиясини тахминан 610 долларга, 12/256ГБ талқинини эса 690 доллар атрофига сотиб олиш мумкин. Смартфон қора ва кўк рангларда мавжуд бўлади.

ЎҚИНГ: Oppo Reno4 Z 5G'нинг техник жиҳатлари ва қадоқ таркиби билан танишинг