Sony виртуал реаллик гарнитуралари бозорида етакчилик қилмоқда
Жорий йилда бир қатор янги технологияларга эга бўлган виртуал реаллик гарнитуралари тақдим этилди. Canalys таҳлилчиларининг фикрича, йил охиригача жаҳон бўйлаб бундай қурилмаларнинг умумий сотуви2 миллион донани ташкил қилиши мумкин экан, 2020 йилга бориб эса ушбу миқдор 20 миллионга етиши кутилмоқда. Ушбу ҳисобга фақат ўз экранига эга VR-гарнитуралар киритилган.
Ўтказилган тадқиқотлар натижасига биноан, Япониянинг Sony компанияси виртуал реаллик шлемлари бозорининг яққол етакчиси деб топилган. Гарчи гарнитура сотуви анча кеч бошланган бўлса-да, япон гиганти ушбу йилда 800 000 дан ортиқ виртуал реаллик шлемини сотишга муваффақ бўлган, деб ёзмоқда IXBT.
Тайваннинг HTC компанияси эса йил давомида 500 000 атрофида Vive гарнитурасини сотиб, рўйхатнинг иккинчи поғонасида жой олди. Агар Vive гарнитурасининг юқори нархда сотилганини инобатга олсак, ушбу натижа анча салмоқли эканини англаш мумкин.
Учинчи ўринни эса 400 000 та атрофида виртуал гарнитура сотган Oculus банд қилди. Кейинги ўринларни турли миқдорда VR-гарнитура сотган Deepoon, Idealens, 3Glasses ва ANTVR каби хитойлик компаниялари эгаллаган.
