Spotify ўзининг сунъий интеллектга асосланган DJ'йини тақдим қилди!

Таниқли мусиқа стриминги платформаси, Spotify, сунъий интеллектга асосланган DJ'ни ишга туширганлигини эълон қилди. Маълум бўлишича, DJ сизнинг мусиқадаги "дид"ингизни аввал тинглаган мусиқаларингиз тарихи ва сиз лайк ёки дизлайк босган мусиқаларга қараб ўрганади. Анъанавий алгоритмдан фарқли ўлароқ, сунъий интеллектга асосланган DJ сизга шунчаки кейинги мусиқани танлаб бериш билан чекланмайди. У худди радиостансия бошловчиси каби қўшиқлар орасида қисқа ва қизиқарли шарҳлар бериб ўтиши билан ўзига хос ҳисобланади.

DJ плейлисти чексиз, яъни у қўшиқларни чексиз таклиф қилаверади, бироқ сиз экрандаги DJ тугмаси орқали жанрлар ёки қўшиқчиларни ўзгартиришингиз мумкин.

DJ'нинг сунъий овози Spotify яқинда сотиб олган Sonantic AI компаниясининг овоз технологияси томонидан қувватланган бўлиб, у компаниянинг собиқ раҳбари, ҳозирда The Get Up подкасти бошловчиси, Хавиер “Х” Жерниган овозига асосланган. Ҳар бир қўшиқ учун айтиладиган шарҳлар эса OpenAI, яъни унинг матнлар яратиб берувчи ChatGPT технологияси ва бошқаларга кўра тайёрланади. Эҳтимол, келажакда фойдаланувчилар DJ овозини, яъни уни кимлигини ўзгартиришлари мумкин бўлади. Хавиер Жерниган ёки бошқалар.

DJ аллақачон АҚШ ва Канададаги Spotify Premium эгалари учун инглиз тилида бета режимида ишга туширилган.

ЎҚИНГ: Девид Гуетта сунъий интеллект ёрдамида Эминемнинг овозини сохталаштирди