Steam'да FPS ҳисоблагичи қандай ёқилади?

Steam'да FPS ҳисоблагичи қандай ёқилади?

Агар орамизда онда-сонда компютер ўйинлари ўйнаб турадиганлар бўлса, унда улар учун FPS сўзи таниш ва унинг нима эканлиги жуда қизиқ бўлиши мумкин. Frames Per Second  (ўзбекчада "сониясига кадрлар") бу сиз компютерда ўйнаётган ўйин кадрлари сониясига қанча кўринаётганлигини аниқлайдиган ўлчов бирлиги ҳисобланади.

FPS қанчалик юқори бўлса, ўйин шунчалик силлиқ бўлади. Агар FPS қанчалик паст бўлса, ўйин шунчалик секин, ёхуд қотиб-қотиб ўйналади. Ва бу кўпинча компютерингиз ички қурилмалари қанчалик яхши эканлиги ёхуд сизга қандай монитор, график карта кераклигини аниқлашда ёрдам беради.

Кўпчилигимиз бугунги CS:GO ёки шунга ўхшаш ўйинларни Steam орқали ўйнаймиз ва унда сиз қуйидаги созламани ўзгартириш орқали ички FPS ҳисоблагичини ёқиб олишингиз мумкин:

  1. Компютерингизда Steam'ни очинг
  2. Чап юқори бурчакдаги Steam тугмасига босинг ва очилган контекст менюдан Settings (Созламалар) бўлимига ўтинг
  3. Менюдан In-Game (Ўйин ичи) саҳифасига ўтинг
  4. У ерда сиз In-game FPS counter (Ўйин ичидаги FPS ҳисоблагичи) созламасини кўришингиз мумкин. FPS ҳисоблагичи ўйин ичида экраннинг қаерида кўринишини танланг ва ОК'ни босинг.

Эндиликда ўйинни очиб, уни ўйнашни бошлаганингизда сиз ўзингиз белгилаган позицияда FPS ҳисоблагичини кўрасиз. Сиз уни исталган вақт ўчириб қўйишингиз мумкин. Бунинг учун FPS ҳисоблагичини қаердан ёққан бўлсангиз ўша ерга ўтинг ва у ердан Off'ни белгилаб ОК'ни босинг.

ЎҚИНГ: Яна бир машхур мессенжерга ҳам "Story" қўшилмоқда