Стив Жобс фойдаланган Macintosh компьютери кимошди савдосига қўйилди
Apple асосчиларидан бири, Стив Жобс фойдаланган Macintosh SE сериясидаги компьютер 22 октябр куни Bonham'да аукционга қўйилмоқда.
Лот тавсифига кўра, 1987 йил охирида Apple Computers томонидан ишлаб чиқарилган Macintosh SE компьютери 20 МБ ички қаттиқ диск, клавиатура, сичқонча билан қўшимча захира қаттиқ дискига эга ва у ҳозирги эгаси, NeXT компанияси ишчисига Стив Жобс томонидан совға қилинган.
Маълум бўлишича, Жобс бу компьютердан Apple'ни тарк этганидан кейин ўзи асос солган компания, NeXT'даги офисида 1988-1994 йилларда фойдаланган. Шунингдек, 1990 ва 1993 йилларда Жобснинг қизи, Лиза Бреннан Жобс ҳам офисга ташриф буюрган вақтларида фойдаланганлиги ҳақида далиллар ҳам бор: почта тизими ва Microsoft Word унинг номи билан рўйхатдан ўтган. компьютер охирги марта 1994 йилда Жобс бошчилик қилган маркетинг лойиҳаси учун ишлатилган ва кейин ўша йил охирида ҳозирги эгасига берилган. Ўшанда Жобс бир кун келиб бу компьютернинг қиймати бўлиши мумкинлигини айтган.
